សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជាជនជាតិចិន សង្ស័យមិនទាន់ស្វាងពីស្រវឹងស្រាបានបេីករថយន្តស៊េរីទំនើបម៉ាកRange Rover ទៅបុករបាំងថ្មពុះចែកទ្រូងផ្លូវគល់ស្ពានអាកាសក្បាលថ្នល់បណ្តាលឱ្យរួញមួយកំណាត់មុខ កាលពីវេលាម៉ោង៦ និង៣០នាទីព្រឹកថ្ងៃទី២៤ ខែសីហា ឆ្នាំ២០២១ នៅចំណុចគល់ស្ពានអាកាសក្បាលថ្នល់ មហាវិថីព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញបុរសម្នាក់ជាជនជាតិចិនទំនងជាស្រវឹងស្រាបានបេីករថយន្តមួយគ្រឿងម៉ាក Range Rover ពណ៌ខ្មៅ ពាក់ស្លាកលេខភ្នំពេញ 2BH-1117 តាមបណ្ដោយមហាវិថីព្រះនរោត្តម ពីជើងទៅត្បូងក្នុងល្បឿនយ៉ាងលឿន ខណ:មកដល់ចំណុចកើតហេតុបានរេចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យខ្ទេចរថយន្តមួយកំណាត់មុខ តែក្នុងករណីនេះមិនបង្កឲ្យមានអ្នកណាម្នាក់រងរបួសឡេីយ ។
ក្រោយកើតហេតុភ្លាមៗ អ្នកបើកបរបានបើកទ្វាររថយន្តចុះគេចខ្លួនបាត់ពីកន្លែងកើតហេតុ ដោយបន្សល់ទុករថយន្តនៅនឹងកន្លែងកេីតហេតុ ។ក្រោយមកទេីបកម្លាំងសមត្ថកិច្ចមូលដ្ឋានបានចុះទៅដល់ ហេីយធ្វេីការទំនាក់ទំនងទៅសមត្ថកិច្ចជំនាញចរាចរណ៍ឱ្យមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំម្ចាស់រថយន្តចូលខ្លួនដោះស្រាយតាមច្បាប់ ៕
ដោយ ៖ ភារ៉ា ដង្កោ
