សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តដឹកកញ្ចក់មួយគ្រឿងយ៉ាងលឿន ហេីយជ្រុលទៅបុករះរថយន្ត៤គ្រឿង ឡំប្រឺតា២គ្រឿង រួមនឹងម៉ូតូ១គ្រឿងទៀតបណ្តាលឱ្យរងការខូចខាត បង្កការភ្ញាក់ផ្អេីលនិងកកស្ទះចរាចរណ៍ដល់អ្នកធ្វើដំណេីរ កាលពីវេលាម៉ោង១០និង១៥នាទី ព្រឹកថ្ងៃទី១៦ ខែតុលា ឆ្នាំ២០២១ ស្ថិតនៅតាមបណ្ដោយផ្លូវលេខ២១៧ ចំណុចមុខវត្តស្ទឹងមានជ័យ ក្នុងភូមិមានជ័យ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ3B-4606 ដឹកកញ្ចក់ពេញលើរថយន្ត បើកបរដោយបុរសម្នាក់រួមដំណើរជាមួយនឹងព្រូរថយន្តម្នាក់ទៀត ធ្វើដំណើរពីកើតទៅលិចចុះពីលើស្ពានស្ទឹងមានជ័យក្នុងល្បឿនលឿន ពេលនោះអ្នកបេីករថយន្តជាន់ហ្រ្វ័ងមិនស៊ីក៏បានជ្រុលចង្កូតទៅបុករថយន្តនៅខាងមុខចំនួន៤គ្រឿងឡំប្រឺតា២គ្រឿងនិងម៉ូតូមួយទៀតដែលកំពុងតែបើកស្របទិសដៅគ្នានៅពីខាងមុខបណ្តាលឲ្យរងការខូចខាតនិងរងរបួសបុរសម្នាក់ផងដែរ។ ចំណែកអ្នកបើកបររថយន្តបង្កហេតុត្រូវបានក្រុមជនរងគ្រោះចាប់ក្របួចជាប់ ហេីយត្រូវពលរដ្ឋស្វាគមន៍ម្នាក់មួយដៃម្នាក់មួយជើងផងដែរ ដោយសារតែគេខឹងនឹងបុរសខាងលើបើករថយន្តលឿនពេកបង្កគ្រោះថ្នាក់ដល់អ្នកដទៃ។
ក្រោយពេលកើតហេតុសមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ខណ្ឌមានជ័យ និងជំនាញចរាចរណ៍រាជធានីភ្នំពេញធ្វើការវាស់វែង រួចយករថយន្តបង្កទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
