សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី ៖ ខណៈដែលស្ថានភាពទឹកកើនឡើងខ្លាំងជាបន្តបន្ទាប់ក្នុងរយៈ ពេល២ថ្ងៃនៅក្នុងខេត្តរតនគិរីមកនេះលោក ទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាសេនាធិការរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នារសៀលថ្ងៃទី២០ ខែតុលា ឆ្នាំ២០២១នេះ បានដឹកនាំមន្ត្រីជំនាញចុះពិនិត្យស្ថានភាពទឹកជំនន់ភ្លាមៗដើម្បីត្រៀមជួយសង្គ្រោះប្រជាពលរដ្ឋ ឱ្យបានទាន់ពេលវេលា។
ការចុះត្រួតពិនិត្យទឹកជំនន់នេះលោក ទេសរដ្ឋមន្ត្រី គន់ គីម បានបញ្ជាក់ថា ស្ថានភាពទឹកជំនន់ ដែលកំពុងជន់លិចនៅក្នុងខេត្តរតនគិរី មិន បានប៉ះពាល់អ្វីធ្ងន់ធ្ងរនោះទេ តែបច្ចុប្បន្នស្ថានភាពទឹកក៏បានចាប់ផ្ដើមស្រកផងដែរបើមិនមានភ្លៀងធ្លាក់បន្តទៀត ហើយស្ថានភាពនេះនឹងកាន់តែមានភាពធូរស្រាលឆាប់ៗនាពេលខាងមុខ។
នៅក្នុងឱកាសនោះ ទេសរដ្ឋមន្រ្តី បានលើកឡើងថា ស្ថានភាពនេះ មានសភាពដូចឆ្នាំ២០១៩ ហើយសន្ទុះទឹកជំនន់ចាប់ផ្ដើមឡើងខ្លាំងនារយៈពេល២ថ្ងៃចុងក្រោយនេះ តែក្រុម ការងារបានត្រៀមទុកជាមុន ដើម្បីជួយអន្តរាគមន៍ដល់ប្រជាពលរដ្ឋដែលរងគ្រោះឲ្យទាន់ពេល។
ទេសរដ្ឋមន្ត្រី បានបន្ថែមថា គិតត្រឹមថ្ងៃទី២០ ខែតុលានេះ ស្ថានភាពទឹកជំនន់បានចាប់ផ្ដើមស្រុកចុះ ហើយបើធាតុអាកាសមិនមានភ្លៀងធ្លាក់បន្តទៀត នោះទឹកកាន់តែស្រក និងមានភាពធូរស្រាលឆាប់ៗ មិនអូសបន្លាយយូរថ្ងៃដូចខាងខេត្តបន្ទាយមាន ជ័យនោះទេ។
លោកទេសរដ្ឋមន្ត្រី គន់ គីម បានបញ្ជាក់ទៀតថា ដើម្បីឆ្លើយតបនឹងបញ្ហាគ្រោះទឹក ជំនន់នេះ គណៈកម្មាធិការជាតិគ្រប់គ្រងគ្រោះមហន្តរាយបានដាក់សំណើទៅ កាន់អង្គការដៃគូ ក្នុងការជួយឧបត្ថម្ភផ្ដល់ជាស័ង្កសី ឬអណ្ដូងទឹក ដើម្បីសាង សង់ផ្ទះជូនដែលងាយរងគ្រោះ ខណៈអាជ្ញាធរ បានចែកដីដល់ពលរដ្ឋម្នាក់មួយឡូតិ៍ ហើយទៅថ្ងៃខាងមុខ គណៈ កម្មាធិការជាតិគ្រប់គ្រងគ្រោះមហន្តរាយ លែងធ្វើរោងគ្របតង់ គឺសាងសង់ផ្ទះដល់ពលរដ្ឋ នៅទីតាំងទួលសុវត្ថិភាពតែម្ដង ពោលដល់រដូវជិតទឹកឡើង ពលរដ្ឋឡើងមកដីឡូតិ៍ពួកគាត់ ដែលអាចទុកជាផ្ទះទីពីររបស់ពួកគាត់។
សូមបញ្ជាក់ថា ចំពោះស្ថានភាពកម្ពស់ទឹកទន្លេសេសាន និងទន្លេស្រែពក គិតត្រឹមព្រឹកថ្ងៃទី២០ខែតុលានេះ ទឹកទន្លេសេសាន អណ្តូងមាស មានកម្ពស់ ៥ម៉ែត្រ មានការស្រកចុះ, ទឹកទន្លេស្រែពក ស្ថានីយលំផាត់កម្ពស់ ១៣.៨៨ ម៉ែត្រ បន្តស្រកចុះ០.០២ម៉ែត្រ។ ផលប៉ះពាល់ដោយគ្រោះទឹកជំនន់នេះ មានចំនួន៦ស្រុក មាន២៣ឃុំ សរុប ២,៦៤២ គ្រួសារ (១១ ១៧៤នាក់) ដំណាំកសិកម្មសរុប ៣,៦៨៨ហិចតា ក្នុងនោះដំណាំស្រូវ ២,១៦៨ហិចតា និងចំការដំណាំ ១,៥២០ហិចតា៕
ដោយ៖ សូរិយា
