សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បេីយោងតាមប្រភពព័ត៍មានពីរបាយការណ៍របស់អគ្គស្នងការនគរបាលជាតិ បានឱ្យដឹងនៅព្រឹកថ្ងៃសុក្រទី០៥ ខែសីហា ឆ្នាំ២០២២នេះថា៖ កម្លាំងអធិការដ្ឋាននគរបាលស្រុកគាស់ក្រឡ ដឹកនាំដោយលោកវរសេនីយ៍ឯក ប៉ាង ហៀង ជាអធិការ បានដឹកនាំកម្លាំងក្នុងអង្គភាពធ្វើការបង្ក្រាបករណីរក្សាទុក ចែកចាយ ជួញដូរដោយខុសច្បាប់នូវសារធាតុញៀន ០១ករណី ឃាត់ខ្លួនជនសង្ស័យចំនួន ២នាក់ កាលពីរសៀលថ្ងៃទី០៤ ខែសីហាម្សិលមិញនេះ ស្ថិតត្រង់ចំណុចក្រុមទី០៤ ភូមិដំណាក់កកោះ ឃុំគាស់ក្រឡ ស្រុកគាស់ក្រឡ ខេត្តបាត់ដំបង ។
របាយការណ៍ដដែលបន្តថា ក្នុងកិច្ចប្រតិបត្តិការនេះ ជំហានដំបូងកម្លាំងសមត្ថកិច្ចបានឃាត់ខ្លួនជនសង្ស័យចំនួន ០២នាក់ ១-ឈ្មោះ ស៊ីម រីន ភេទប្រុស អាយុ ៣៦ឆ្នាំ ។ ២-ឈ្មោះ មាស ស្រីយ៉ា ភេទស្រី អាយុ ៣៧ឆ្នាំ អ្នកទាំងពីរមានទីលំនៅភូមិដំណាក់កកោះ ឃុំគាស់ក្រឡ ស្រុកគាស់ក្រឡ ខេត្តបាត់ដំបង ។
វត្ថុតាងដកហូតរួមមាន៖
-ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន ១៨ថង់
-ទូរស័ព្ទចំនួន ០១គ្រឿង ម៉ាកវីវ៉ូ Vivo ពណ៌ខៀវ
-ដែកកេសចំនួន ០៤
-កូនថង់សម្រាប់រំលែកថ្នាំញៀនមួយចំនួន ។
ក្រោយធ្វើការសាកសួររួច និងដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀន លោកអធិការស្រុកគាស់ក្រឡបានដឹកនាំកម្លាំងជំនាញបានបន្តនីតិវិធី ធ្វើការឃាត់ខ្លួនមេខ្លោង ០១នាក់ទៀត ឈ្មោះ ហុង សៅរ៍ ភេទប្រុស អាយុ ៣៦ឆ្នាំ រស់នៅចំណុចក្រុមទី០៩ ភូមិបឹងព្រីង ឃុំព្រៃតូច ស្រុកមោងឬស្សី ខេត្តបាត់ដំបង ។
ជាលទ្ធផលសមត្ថកិច្ចបានដកហូតវត្ថុតាងរួមមាន ៖
-ឧបករណ៍សំរាប់ប្រើប្រាស់គ្រឿងញៀនចំនួនមួយ
-ទូរស័ព្ទចំនួន ០១គ្រឿង ម៉ាកវីវ៉ូ Vivo ពណ៌ត្រួយចេក ។
បច្ចុប្បន្នជនសង្ស័យទាំងបីនាក់ រួមនឹងវត្ថុតាងត្រូវបាននគរបាលស្រុកកសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
ដោយ៖អារុណរះ
