សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើតាមឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែងថា៖ មានយានយន្តសរុបចំនួន ៥៣៤គ្រឿង ត្រូវបាននគរបាលទូទាំងប្រទេសត្រួតពិនិត្យ និងផាកពិន័យតាមអនុក្រឹត្យលេខ៣៩.អនក្រ.បក នៅថ្ងៃទី១១ ខែកញ្ញា ឆ្នាំ២០២២នេះ ក្នុងនោះមានម៉ូតូ ៤៣៣គ្រឿង និងរថយន្ត ១០១គ្រឿង។
លោកឧត្តមសេនីយ៍ឯក ឆាយ គឹមខឿន បានគូសបញ្ជាក់ថា៖ សមត្ថកិច្ចនគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១១៤,១៤៦គ្រឿង ក្នុងនោះមានម៉ូតូ ៩១,៧៤០គ្រឿង និងរថយន្តគ្រប់ប្រភេទ ២២,៤០៦គ្រឿង គិតថ្ងៃទី១១ ខែកញ្ញា ក្នុងឆ្នាំ២០២២នេះ។
បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា ទូរស័ព្ទ និងអត់ស្លាកលេខជាដើម។ ដោយឡែករថយន្តល្បឿន អត់ស្លាកលេខ ឆៀក ទូរស័ព្ទ ល្មើសសញ្ញា ខ្សែក្រវាត់ និងអត់ប័ណ្ណបើកបរជាដើម។
ឧត្តមសេនីយ៍ឯក ឆាយ គឹមខឿន បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត។
ដោយឡែក សម្រាប់ថ្ងៃទី១១ ខែកញ្ញា ឆ្នាំ២០២២នេះដែរ ករណីគ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៩លើក ក្នុងនោះស្លាប់ចំនួន ០៧នាក់ របួសចំនួន ០៩នាក់ (របួសធ្ងន់ ០៦នាក់)។ រយៈពេល២៥៤ថ្ងៃមានករណីគ្រោះថ្នាក់ចរាចរណ៍ចំនួន ២,១១៩លើក បណ្ដាលឱ្យមនុស្សស្លាប់ ១,២២៧នាក់ របួស ២,៩២៩នាក់ (របួសធ្ងន់ ១,៨៨១នាក់)៕
ដោយ៖ស តារា(រូបភាព៖ ឯកសារ)
