សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានអំពាវនាវសារជាថ្មីម្ដងទៀតឲ្យប្រជាពលរដ្ឋប្រញាប់រួសរាន់ទៅចាក់វ៉ាក់សាំងដូសជំរុញ ខណៈជំងឺកូវីដ-១៩ បន្តបំប្លែងខ្លួនថ្មីជាបន្តបន្ទាប់ ហើយការចាក់វ៉ាក់សាំងនេះក៏ត្រូវធ្វើតាមកាលកំណត់របស់គ្រូពេទ្យផងដែរ។
លោកស្រីវេជ្ជបណ្ឌិតឱ វណ្ណឌីន រដ្ឋលេខាធិការក្រសួង សុខាភិបាល និងប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស នៅថ្ងៃទី១៦ ខែវិច្ឆិកានេះថ្លែងថា បើទោះបីបច្ចុប្បន្នស្ថានភាពជំងឺកូវីដ-១៩ នៅប្រទេសកម្ពុជា មានភាពធូស្រាលក្តី តែប្រជាពលរដ្ឋមិនត្រូវធ្វេសប្រហែសនោះទេ ព្រោះថា ជំងឺកូវីដ-១៩នៅបន្តបំប្លែងខ្លួនថ្មីៗជាប់ ជានិច្ច។ លោកស្រីរដ្ឋលេខាធិការបានអំពាវនាវបងប្អូនទាំងអស់ បន្តប្រុងប្រយ័ត្ន ដោយអនុវត្តវិធានការ៣កុំ ៣ការពារ និងទៅទទួលការចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ ទី៤ និងទី៥ ឱ្យបានគ្រប់ៗគ្នា ដើម្បីរក្សាបាននូវភាពស៊ាំបុគ្គល និងភាពស៊ាំសហគមន៍ ធានាបាននូវនិរន៍ភាពនៃការរស់នៅប្រចាំថ្ងៃក្នុងប្រក្រតីភាពថ្មីបានយូរអង្វែង។
ចំណែកប្រជាពលរដ្ឋដែលមកចាក់វ៉ាក់សាំងនៅមណ្ឌល សុខភាពស្ទឹងមានជ័យ បានលើកឡើងដែរថា បន្ទាប់ពីចាក់វ៉ាក់សាំងដូសជំរុញរួចសុខភាពធម្មតា ហើយការស្ម័គ្រចិត្តមកចាក់វាក់សាំងនេះទៀតសោត គឺដើម្បីការពារខ្លួនពីជំងកូវីដ-១៩ និងមិនចង់ឲ្យប្រទេសកម្ពុជាបិទខ្ទប់ដូចឆ្នាំ២០២១ ព្រោះជំងឺកូវីដនោះទេ។
ប្រធានមណ្ឌលសុខភាពស្ទឹងមានជ័យលោកស្រី ហ៊ាង មករា មានប្រសាសន៍ដែរថា បច្ចុប្បន្ននៅមណ្ឌល សុខភាព មានវ៉ាក់សាំងកូវីដ-១៩ ពីប្រភេទរួមមាន៖ Pfixzer និង Sinova សម្រាប់ចាក់ជូនប្រជាពលរដ្ឋ មានទាំងដូសមូលដ្ឋាន និងជំរុញ ហើយប្រជាពលរដ្ឋបន្តមកទទួលការចាក់វ៉ាក់សាំងកូវីដជាហូរហែ។
បច្ចុប្បន្នការចាក់វ៉ាក់សាំងបង្កាជំងឺកូវីដ-១៩ ត្រូវបានរាជរដ្ឋាភិបាល បន្តចាត់ទុកជាយុទ្ធសាស្រ្តដ៏សំខាន់មួយ ដើម្បីធានានិរន្តរភាព សេដ្ឋកិច្ច និងការរស់នៅជាធម្មតា តាមបែបគន្លងថ្មី ជាមួយជំងឺកូវីដ-១៩។
សម្រាប់ប្រជាពលរដ្ឋមិនទាន់ចាក់វ៉ាក់សាំងកូវីដពីដូសមូលដ្ឋានរហូតដល់ ដូសជំរុញ គឺអាចទៅទទួលការចាក់វ៉ាក់សាំងនៅគ្រប់ទីតាំងសុខាភិបាលសាធារណៈ ឫទីតាំងចល័តរៀបចំដោយក្រសួងសុខាភិបាល សហការជាមួយដៃគូរពាក់ព័ន្ធ៕
ដោយ៖ សូរិយា
