សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកនាំពាក្យរបស់គណបក្សប្រជាជនកម្ពុជា លោក សុខ ឥសាន្ត បានថ្លែងបញ្ជាក់ថា៖ នារីដែលធ្វើការនៅសេវាកម្មកម្សាន្ដនានានៅទូទាំងប្រទេសដូចជានារីបំរើនៅក្នុងខារ៉ាអូខេ នារីផ្តល់សេវាកម្មស្រាបៀរ រត់តុ និងសេវាកម្មផ្សេងៗទៀត នឹងទទួលបានមេធាវីការពារក្តី ពីសំណាក់សម្តេចតេជោ ហ៊ុន សែន នាយករដ្ឋមន្រ្តី ដើម្បីរកយុត្តិធម៌ដល់ពួកគេក្រោយពីមានការ រំលោភបំពានអ្វីមួយដោយខុសច្បាប់។ ការថ្លែងបែបនេះរបស់លោក សុខ ឥសាន្ត នាឱកាសលោកប្រាប់អ្នកសារព័ត៌មានក្រោយបញ្ចប់នូវមហាសន្តិបាតវិសាមញ្ញ តំណាងទូទាំងប្រទេសរបស់ គណបក្សប្រជាជនកម្ពុជា ដែលបានធ្វើឡើងរយៈពេលពីរថ្ងៃគឺថ្ងៃទី២៨-២៩ ខែមករា ឆ្នាំ២០២៣នេះ។
លោក សុខ ឥសាន្ត បានគូសបញ្ជាក់ថា នៅក្នុងមហាសន្តិបាត សម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា បានណែនាំឱ្យមានការរៀបចំមេធាវី ដើម្បីការពារសិទ្ធនារីប្រកបរបរខាងសេវាកម្សាន្ត ក្នុងករណីពួកគាត់ទទួលរងការរំលោភបំពាន ឬអំពើហិង្សាណាមួយកើតមានឡើង។
លោកអ្នកនាំពាក្យរូបនេះ បានបញ្ជាក់បន្ថែមថា អ្នកដែលទទួលបន្ទុកនូវកិច្ចការខាងលើនេះត្រូវបាន ប្រគល់ជូន លោកស្រីសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីទំនាក់ទំនងរដ្ឋសភាពព្រឹទ្ធ សភា និងជាអនុប្រធានគណបក្សប្រជាជនកម្ពុជា។
លោកអ្នកនាំពាក្យ បានគូសបញ្ជាក់ទៀតថា ការដែលផ្តល់មេធាវីការពារក្តីដល់នារីបំរើសេវាកម្មកម្សាន្តនេះ ក៏ដើម្បីជំរុញក្នុងការពង្រឹង និងលើកកម្ពស់ការងារក្រុមសេដ្ឋកិច្ចក្រៅប្រព័ន្ធនៅកម្ពុជាផងដែរ ខណៈកិច្ចការនេះត្រូវបានរាជរដ្ឋាភិបាលបានកំពុងធ្វើ និងជំរុញ បន្ថែមនាពេលខាងមុខនេះ៕
ដោយ៖សហការី
