សារព័ត៌មាន នគរវត្ត តែងតែនាំមុខគេជានិច្ច
ពលរដ្ឋអាមេរិកអាយុ ៧៨ឆ្នាំ ទើបតែត្រូវបានតុលាការចិនកាត់ទោសឲ្យជាប់ពន្ធនាគារអស់មួយជីវិត ពីបទចារកម្ម។
លោក John Shing-wan Leung ដែលជាអ្នករស់នៅអចិន្ត្រៃយ៍នៃទីក្រុងហុងកុង (ប្រទេសចិន) ត្រូវបានចោទប្រកាន់ពីបទចារកម្ម ហើយត្រូវបានកាត់ទោសឱ្យជាប់ពន្ធនាគារអស់មួយជីវិតកាលពីថ្ងៃចន្ទនៅឯតុលាការប្រជាជនកម្រិតមធ្យមក្នុងទីក្រុង Suzhou ភាគខាងកើតប្រទេសចិន នេះបើយោងតាមការចុះផ្សាយរបស់ សេចក្តីថ្លែងការណ៍ដែលបានចេញផ្សាយនៅលើគណនីប្រព័ន្ធផ្សព្វផ្សាយសង្គមរបស់តុលាការ។
យោងតាមសេចក្តីថ្លែងការណ៍ខ្លីនេះ លោក Leung ត្រូវបានចាប់ខ្លួននៅថ្ងៃទី ១៥ ខែមេសា ឆ្នាំ ២០២១ ដោយភ្នាក់ងារសន្តិសុខនៅទីក្រុង Suzhou ខេត្ត Jiangsu ។ ទោះជាយ៉ាងណា សេចក្តីថ្លែងការណ៍មិនបានដឹងលម្អិតពីបទឧក្រិដ្ឋរបស់គាត់ទេ។ តុលាការក៏បានរឹបអូសទ្រព្យសម្បត្តិផ្ទាល់ខ្លួនដែលមានតម្លៃ 500,000 យ័ន ឬប្រហែល 72,000 ដុល្លារផងដែរ។
ទីភ្នាក់ងាររដ្ឋាភិបាលចិន និងប្រព័ន្ធផ្សព្វផ្សាយរដ្ឋមិនបានចេញផ្សាយព័ត៌មានលម្អិតអំពីការកាត់ទោសរបស់លោក Leung ឬដំណើរការរបស់តុលាការដែលនាំទៅដល់ការកាត់ទោសលោក Leung នោះទេ។ យោងតាមអ្នកសង្កេតការណ៍ ការកាត់ក្តីពាក់ព័ន្ធនឹងសន្តិសុខជាតិ ជារឿយៗត្រូវបានដោះស្រាយដោយសម្ងាត់ និងមានអត្រាផ្តន្ទាទោសរហូតដល់ ៩៩%។
ស្ថានទូតអាមេរិកក្នុងទីក្រុងប៉េកាំងបាននិយាយកាលពីថ្ងៃចន្ទថាខ្លួនបានដឹងអំពីការកាត់ទោសលោក Leung។ អ្នកនាំពាក្យរបស់ស្ថានទូតអាមេរិកបាននិយាយនៅក្នុងសេចក្តីថ្លែងការណ៍មួយទៅកាន់ CNN ថា “ក្រសួងការបរទេសមិនមានអាទិភាពធំជាងអាទិភាពនៃសុវត្ថិភាពរបស់ពលរដ្ឋអាមេរិកនៅបរទេសនោះទេ។ សម្រាប់ហេតុផលឯកជនភាព យើងមិនអាចធ្វើអត្ថាធិប្បាយបន្ថែមបានទេ៕ ដោយ៖ ធីរីណា
រូបថត ៖ CNN
