សារព័ត៌មាន នគរវត្ត តែងតែនាំមុខគេជានិច្ច
ក្រុមមេឃខៀវ Manchester City បានបង្ហាញទម្រង់លេងឥតឈប់ឈរជាមួយនឹងគុណភាពដ៏អស្ចារ្យដើម្បីយកឈ្នះក្រុម Real Madrid និងឈានដល់វគ្គផ្តាច់ព្រ័ត្រ Champions League ទល់នឹងក្រុម Inter Milan ក្នុងទីក្រុង Istanbul ក្នុងលទ្ធផល៤ទល់០ សរុបទាំង២ជើង៥ទល់១។ Man City បានចាញ់ក្នុងវគ្គពាក់កណ្តាលផ្តាច់ព្រ័ត្រពីលើកមុនក្រោមស្នាដៃក្រុម Real Madrid ប៉ុន្តែពួកគេមិនមានកំហុសនៅពេលនេះ នៅឯកីឡដ្ឋាន Etihad នោះទេ ដោយពេលនេះឈរមួយជំហានទៀតពីការដណ្តើមយកពានរង្វាន់ដែលតែងតែនៅឆ្ងាយពីក្រុមរបស់លោក Pep Guardiola ។
ការបង្ហាញទម្រង់លេងរបស់ក្រុម Man City នៅក្នុងតង់ទី១ ធ្វើបានល្អដោយរកបាន២គ្រាប់នាំមុខ ជាពិសេសគឺការលេងដោយទំនុកចិត្តក្រោមការដឹកនាំរបស់គ្រូបង្វឹកលោក Pep Guardiola។ ការប្រកួតបានឆ្ពោះទៅរកពានរង្វាន់៣គឺក្របខ័ណ្ឌ Champions League ក្របខ័ណ្ឌ Premier League ដែលអាចឈ្នះជាមួយនឹងជ័យជម្នះនៅផ្ទះ Chelsea នៅថ្ងៃអាទិត្យ និងពានរង្វាន់ FA Cup ដែលពួកគេប្រកួតជាមួយក្រុម Manchester United នៅវគ្គផ្តាច់ព្រ័ត្រនៅ Wembley ។
អ្នកចាំទី Thibaut Courtois របស់ Real Madrid បានសង្គ្រោះការតែតបាល់បញ្ចូលទីរបស់ Erling Haaland ចំនួន២គ្រាប់នៅដើមតង់ទី១ ប៉ុន្តែគាត់មិនអាចរារាំងក្នុងការបញ្ឈប់ការស៊ុតបាល់បញ្ចូលទីរបស់ Bernardo Silva នៅនាទីទី២៣ ហើយខ្សែបម្រើព័រទុយហ្គាល់បានស៊ុតបាល់បញ្ចូលទីរូបនេះរកបានគ្រាប់ទី២នៅនាទីទី៣៧តង់ទី១។
Man City បានប្រឈមមុខនឹងការគម្រាមកំហែងពី Real Madridម្តងម្កាល ក្នុងតង់ទី២ ត្រូវបានអ្នកចាំទី Ederson ជួយសង្គ្រោះបានយ៉ាងល្អពីការស៊ុតចំគោលដៅរបស់ David Alaba និង Karim Benzema។ ប៉ុន្តែ Man City នៅតែបន្តនាំមុខ១គ្រាប់ទៀតពីការតែតបាល់របស់ Manuel Akanji នៅនាទីទី៧៦។
កីឡាករបម្រុង Julian Alvarez រកបានគ្រាប់បាល់ទី៤ឲ្យ Man City បន្ទាប់ពីការបញ្ជូនបាល់របស់ Phil Foden ដ៏អស្ចារ្យ។ Man City បានបង្ហាញទម្រង់លេងដ៏អស្ចារ្យមួយដើម្បីក្លាយជាក្លិបអង់គ្លេសទី២ដែលឈ្នះពានរង្វាន់ទាំងក្នុងស្រុក និង Champions League ដែលដំបូងធ្លាប់ធ្វើបានដោយ Manchester United ក្នុងឆ្នាំ១៩៩៩។
Man City បានឡើងឈរកំពូលតារាងលើក្រុម Arsenal ក្នុងការប្រជែងដណ្តើមពាន Premier League ហើយនឹងក្លាយជាក្រុមដែលមានក្តីសង្ឃឹមច្រើនលើសលប់ដើម្បីផ្តួល Inter Milan ទោះបីជាការចង់រក្សាភាពអស្ចារ្យនេះសម្រាប់ខ្លួននឹងផ្តល់ថាមពល និងការលើកទឹកចិត្តសម្រាប់ជួបជាមួយMan United ក្នុងវគ្គផ្តាច់ព្រ័ត្រ FA Cup នៅ Wembley ក៏ដោយ។
Manchester City នឹងប្រកួតជាមួយ Inter Milan វគ្គផ្តាច់ព្រ័ត្រនៅថ្ងៃទី១០ ខែមិថុនា នៅទីក្រុង Istanbul ប្រទេសទួរគីខាងមុខ ខណៈManchester City កំពុងសម្លឹងរកការឈ្នះពាន Champions League ជាលើកដំបូង ៕
ដោយ៖ ភារៈ(រូបភាព ៖ BBC Sport)
