៥០០ថ្ងៃនៃសង្រ្គាមនិងអារម្មណ៍របស់ជនភៀសខ្លួនអ៊ុយក្រែន

ចែករំលែក៖

បន្ទាប់ពីសង្គ្រាមអូសបន្លាយ ៥០០ថ្ងៃ ទាហានរុស្ស៊ីគ្រប់គ្រងជិត 20% នៃទឹកដីអ៊ុយក្រែន ហើយប្រជាជនអ៊ុយក្រែនជាង 6.3 លាននាក់ត្រូវបានផ្លាស់ទីលំនៅទៅក្នុងប្រទេសជាច្រើនក្នុងនិងក្រៅទ្វីបអឺរ៉ុប។
ជិត500ថ្ងៃមុន នៅព្រឹកព្រលឹមដ៏ត្រជាក់នៃថ្ងៃទី 24 ខែកុម្ភៈ ឆ្នាំ 2022 រុស្ស៊ីបានចាប់ផ្តើមប្រតិបត្តិការយោធាពិសេសមួយនៅអ៊ុយក្រែន។ នៅពេលនោះ គ្មាននរណាម្នាក់អាចទស្សន៍ទាយបានថា សង្រ្គាមដីគោកដ៏សាហាវបំផុតនៅទ្វីបអឺរ៉ុបចាប់តាំងពីសង្គ្រាមលោកលើកទី 2 នឹងអូសបន្លាយជាង16 ខែដោយគ្មានសញ្ញានៃការបញ្ចប់ ជាមួយនឹងតម្លៃនៃការខូចខាត នេះបើយោងតាមការប៉ាន់ស្មានចុងក្រោយរបស់ Kiev ។ សង្គ្រាមនោះបានបផ្លាញសេដ្ឋកិច្ចមានតម្លៃជាង១៤៣ពាន់លានដុល្លារ ហើយរុស្ស៊ីគ្រប់គ្រងជិត ២០% នៃទឹកដីអ៊ុយក្រែន។
ជម្លោះនេះបានបណ្តាលឱ្យមានវិបត្តិជនភៀសខ្លួនដ៏ធំបំផុតចាប់តាំងពីសង្គ្រាមលោកលើកទីពីរ។ គិតត្រឹមថ្ងៃទី 500 ចាប់តាំងពីការផ្ទុះឡើងសង្ក្រាម ប្រជាជនអ៊ុយក្រែនជាង 6.3 លាននាក់កំពុងស្វែងរកសិទ្ធិជ្រកកោននៅបរទេស ហើយប្រហែល 6 លាននាក់ទៀតត្រូវបានផ្លាស់ទីលំនៅពីផ្ទះរបស់ពួកគេដើម្បីជម្លៀសនៅក្នុងប្រទេស នេះបើយោងតាមទិន្នន័យចងក្រងដោយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន។ (UNHCR) បានប្រកាសនៅថ្ងៃទី ៧ខែកក្កដា។
ជាពិសេស ក្នុងចំណោមជនភៀសខ្លួនអ៊ុយក្រែន 6.3 លាននាក់ ប្រហែល 5.96 លាននាក់ជាជនភៀសខ្លួននៅអឺរ៉ុប ខណៈដែលជនភៀសខ្លួន 364.000 នាក់ត្រូវបានកត់ត្រានៅក្រៅទ្វីប។ រុស្ស៊ីជាប្រទេសដែលមានប្រជាជនអ៊ុយក្រែនច្រើនជាងគេគឺជិត ១,៣ លាននាក់ តាមពីក្រោយដោយប្រទេសអាល្លឺម៉ង់ ១,១ លាននាក់។ ប្រទេសប៉ូឡូញ ដែលបានក្លាយជា “ច្រកទ្វារទៅកាន់សហភាពអឺរ៉ុប” សម្រាប់ជនភៀសខ្លួន ជាប់ចំណាត់ថ្នាក់លេខ៣ ដែលមានប្រជាជនជិត ១លាននាក់។
សាធារណរដ្ឋឆេកបានទទួលជនភៀសខ្លួនច្រើនជាង 350.000, ចក្រភពអង់គ្លេសមានច្រើនជាង 206.000 ខណៈពេលដែលប៊ុលហ្គារី អុីតាលី ម៉ុលដាវី ស្លូវ៉ាគី និងរូម៉ានី ដែលប្រទេសនីមួយៗទទួលជនភៀសខ្លួនជាង100.000 នាក់។ ប្រទេសអូទ្រីស និងហុល្លង់ ដែលប្រទេសនីមួយៗបានទទួលជនភៀសខ្លួនជិត ១០ ម៉ឺននាក់ផងដែរ។
អ្នកស្រី Elena អាយុ 41 ឆ្នាំ ជាវិស្វករមកពីតំបន់ Donetsk បាននិយាយថា នាងសម្រេចចិត្តទៅជ្រកកោននៅក្នុងប្រទេសរុស្ស៊ី ដោយសារតែមិនមានឧបសគ្គខាងភាសា ហើយនាងមានសាច់ញាតិឆ្ងាយនៅទីនោះ ដែលអាចទទួលយកនាងនិងគ្រួសាររបស់នាងក្នុងពេលបច្ចុប្បន្ន។
ទីភ្នាក់ងារសារព័ត៌មាន Anadolu បានផ្សាយថា “ខ្ញុំមានការអប់រំខ្ពស់ ហើយខ្ញុំគិតថាមានឱកាសច្រើនសម្រាប់ខ្ញុំក្នុងការស្វែងរកការងារល្អនៅទីនេះ (រុស្ស៊ី)។ ប្រសិនបើខ្ញុំទៅអឺរ៉ុប ទោះបីជាសញ្ញាបត្ររបស់ខ្ញុំត្រូវបានទទួលស្គាល់ក៏ដោយ វានឹងពិបាកសម្រាប់ខ្ញុំក្នុងការស្វែងរកការងារ ព្រោះខ្ញុំអាចនិយាយភាសាអង់គ្លេសបានតិចតួចប៉ុណ្ណោះ ដែលវាមិនគ្រប់គ្រាន់សម្រាប់ប្រភេទការងារដែលខ្ញុំធ្វើនោះទេ» ៕ ដោយ៖ ធីរីណា