សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ បានឱ្យដឹងថា បុរសម្នាក់ដែលចេញវីដេអូប្រមាថដល់ព្រះមហាក្សត្រនោះ ត្រូវបានចៅក្រមស៉ើបសួរសាលាដំបូងខេត្តកំពង់ស្ពឺ សម្រេចចេញដីកាបង្គាប់ឱ្យឃុំខ្លួនបណ្ដោះអាសន្នដាក់ពន្ធនាគារខេត្តកំពង់ស្ពឺ នៅថ្ងៃទី២៤ ខែកក្កដា ឆ្នាំ២០២៣នេះ។
សូមជម្រាបថា ជនជាប់ចោទមានឈ្មោះ ស្វាយ សុផាត បច្ចុប្បន្នមានតួនាទីជាអ្នកសារព័ត៌មាន វ័យ៥០ឆ្នាំ បានបង្ហោះវីដេអូប្រមាថដល់ព្រះមហាក្សត្រដែលប្រព្រឹត្តិនៅក្នុងភូមិផ្លោច ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺកាលពីថ្ងៃទី២២ ខែកក្កដា ឆ្នាំ២០២៣។
ប្រភពដដែលបន្តថា ជនជាប់ចោទខាងលើនេះ ត្រូវបានតុលាការចោទប្រកាន់ពីបទ «ប្រមាថចំពោះអង្គព្រះមហាក្សត្រ» តាមមាត្រា៤៣៧ (ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌដែលចែងថា នឹងត្រូវផ្តន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ និងពិន័យជាប្រាក់ពី ២លានរៀលទៅ ១០លានរៀល។
គួរបញ្ជាក់ថា ក្នុងវីដេអូដែលបានបង្ហោះនោះលោក ស្វាយ សុផាត បានបបួលព្រះមហាក្សត្រភ្នាល់គ្នាដោយស្នើព្រះមហាក្សត្រដាក់ព្រះកេសព្រះអង្គក្នុងការភ្នាល់ជាមួយខ្លួនផង ដែលនេះជាភាសាប្រមាថដែលមិនអាចទទួលបាន៕
ដោយ៖ សហការី
