🔴បិទហាងកែសម្ផស្សយីហោ អេស88ប៊ីយូធី ក្រោយព្យួរសេរ៉ូមឱ្យស្បែក សបណ្តាលឱ្យប្រពន្ធពាក់មី សង្គ្រោះបន្ទាន់

ភ្នំពេញ៖ មានការភ្ញាក់ផ្អើលមុននេះលើបណ្តាញសង្គមក្រោយពីហាងកែសម្ផស្សយីហោ  S88 Beauty នៅតំបន់ផ្សារធំថ្មីដែលរកឃើញថាមិនមានអជ្ញាប័ណ្ណត្រឹមត្រូវ  និងបានព្យាបាលអ្នកជំងឺឲ្យរងរបួសធ្ងន់។ ប្រភពក្រៅផ្លូវការលើកឡើងថា ជនរងគ្រោះត្រូវបានគេស្គាល់ថាជាប្រពន្ធតារាកំប្លែងល្បីឈ្មោះ  នាយពាក់មី  នោះតែម្តង។ នៅមិនទាន់មានការបញ្ជាក់លម្អិតជុំវិញករណីបិទហាងកែសម្ផស្សមួយកន្លែងនេះនៅឡើយ។

ហាងកែសម្ផស្សនេះស្ថិតនៅផ្ទះលេខ១១០E0 តាមបណ្តោយផ្លូវលេខ៥៣  សង្កាត់ផ្សារថ្មី៣  ខណ្ឌដូនពេញ  ។ យោងទៅតាមកំណត់ហេតុនៃការបិទទីតាំងគឺចាប់ពីថ្ងៃទី០៣ ខែសីហាឆ្នាំ ២០២៣បានបិទជាបណ្តោះអាសន្ននៃហាងនេះត្រូវបានធ្វើឡើងដោយមានមន្ត្រីមូលដ្ឋានចូលរួម ដោយក្នុងកំណត់ហេតុនោះបានបញ្ជាក់ថាទីតាំងហាងខាងលើនេះមិនមានច្បាប់អនុញ្ញាតពីក្រសួងសុខាភិបាល និងបណ្តាលឲ្យមានគ្រោះថ្នាក់ដល់ជនរងគ្រោះដែលកំពុងសង្គ្រោះបន្ទាន់នៅមន្ទីរពេទ្យកាល់ម៉ែត។ មិនមានាការបញ្ជាក់អំពីករណីនៃការរងគ្រោះនេះបណ្តាលមកពីការព្យាបាល ឬកែសម្ផស្សលើចំណុចណាមួយនៅឡើយ ខណៈដែលនាយពាក់មីនៅមិនទាន់អាចស្វែងរកការបញ្ជាក់បាននៅឡើយ។ ប៉ុន្តែមុននេះនាយពាក់មីបានបង្ហោះសារថាប្រពន្ធខ្លួនសង្គ្រោះបន្ទាន់នៅមន្ទីរពេទ្យ២ថ្ងៃហើយមិនដឹងខ្លួន ក្រោយពីព្យួរសេរ៉ូមឲ្យស្បែក ស នៅគ្លីនិកខាងលើ។ លោកចោទជាសំណួរថាតើម្ចាស់គ្លីនិកកែសម្ផស្សទាំង១៨ យីហោS88 Beauty ជារបស់អ្នកណា?

គួរបញ្ជាក់ផងដែរថាវិស័យកែសម្ផស្សនៅកម្ពុជានាពេលបច្ចុប្បន្នត្រូវបានគេកក់សម្គាល់ឃើញថាមានការកើនឡើងគួរឲ្យកត់សម្គាល់ ដែលរហូតអ្នកខ្លះបានយល់ថាការកែសម្ផស្សគឺជារឿងធម្មតា ប៉ុន្តែទោះជាយ៉ាងណាកន្លងទៅក៏មានអតិថិជនមួយចំនួនបានរងរបួស ខូចសម្រស់លើសដើម ហើយក៏មានករណីខ្លះសង្គ្រោះបន្ទាន់ និងករណីខ្លះកែសម្ផស្សខុសបច្ចេកទេបានបណ្តាលឲ្យស្លាប់បាត់បង់ជីវិតក៏មាន ។ ដូចនេះអតិថិជនគួរជ្រើសរើសគ្លីនិកណាដែលមានការទទួលស្គាល់ពីក្រសួងសុខាភិបាល មានវេជ្ជបណ្ឌិតជំនាញច្បាស់ ដើម្បីបញ្ចៀសគ្រោះថ្នាក់ និងហានីភ័យសម្រាប់ថ្ងៃក្រោយ៕

ដោយ ៖ វឌ្ឍនា