សារព័ត៌មាន នគរវត្ត តែងតែនាំមុខគេជានិច្ច
អ្នកចាត់ការទូទៅលោក Carlo Ancelotti បាននិយាយកាលពីថ្ងៃព្រហស្បតិ៍ថា ក្លិប Real Madrid បានច្រានចោលការចុះហត្ថលេខាយកខ្សែប្រយុទ្ធ Kylian Mbappe មុនពេលទីផ្សារដោះដូរកីឡាករបិទនៅសប្តាហ៍ក្រោយនេះ។ លោកនិយាយបែបនេះស្របពេលដែលខ្សែប្រយុទ្ធ Paris St Germain រូបនេះបន្តទាក់ទងជាមួយក្លិប La Liga។
លោក Ancelotti បានបន្ថែមថា Real Madrid ទំនងជាមិនធ្វើអាជីវកម្មផ្ទេរបន្ថែមទៀតទេនៅក្នុងទីផ្សារបច្ចុប្បន្នដែលនឹងបិទនៅថ្ងៃទី១ខែកញ្ញានោះទេ។ នៅពេលសួរអំពីខ្សែប្រយុទ្ធបារាំង Mbappe គាត់បានប្រាប់អ្នកសារព័ត៌មានថា “ទេ ខ្ញុំច្រានចោល១០០ភាគរយ។ ខ្ញុំគិតថាក្រុមរបស់យើងត្រូវបានបិទ ហើយកីឡាកររបស់យើងកំពុងគិតអំពីរដូវកាលរបស់យើង” ។
ទីផ្សារដោះដូរកីឡាករនៅតែបើកក្នុងប្រទេសអារ៉ាប៊ីសាអ៊ូឌីត លើសពីថ្ងៃទី១ ខែកញ្ញា ដែលមានន័យថា ក្លិបមកពីប្រទេសឈូងសមុទ្រពែរមួយនេះនៅតែអាចជ្រើសរើសកីឡាករល្អបំផុតរបស់អឺរ៉ុប ប៉ុន្តែគ្រូបង្វឹកក្លិបReal Madrid មិនបារម្ភទេ។ លោកបានបន្ថែមនៅមុនការប្រកួត La Liga របស់ Real Madrid នៅ Celta Vigo កាលពីថ្ងៃសុក្រថា “នរណាម្នាក់អាចផ្លាស់ប្តូរគំនិតរបស់ពួកគេ ប៉ុន្តែខ្ញុំមិនខ្លាចនោះទេ” ។
ខ្សែបម្រើ Luka Modric មិនបានចាប់ផ្តើមការប្រកួតលីក២លើកដំបូងរបស់ Real Madrid ដែលនាំឱ្យមានការរំពឹងទុកថា កីឡាករក្រូអាតមិនសប្បាយចិត្តនឹងស្ថានភាពនេះជាអ្វីដែលលោក Ancelotti បានបដិសេធ។លោកAncelotti បាននិយាយថា “Luka បានកំណត់អនាគតរបស់គាត់រួចហើយគាត់មិនមានបញ្ហាអ្វីទេ គាត់នឹងរួមចំណែក។ វាជាស្ថានភាពពិសេសសម្រាប់អ្នករាល់គ្នា សម្រាប់គាត់ វាជារឿងចម្លែកដែលមិនបានលេងតាំងពីនាទីដំបូង ប៉ុន្តែគាត់នឹងរួមចំណែកដូចរាល់ដង”។
លោក Ancelotti ក៏បាននិយាយផងដែរថា កីឡាករចំណូលថ្មី Kepa Arrizabalaga ដែលបានចូលរួមជាមួយក្រុមតោខៀវ Chelsea នឹងបង្ហាញខ្លួនជាលើកដំបូងក្នុងការប្រកួតលីកក្នុងផ្ទះដំបូងរបស់ Real Madridក្នុងរដូវកាលនេះ។ Andriy Lunin គឺជាអ្នកចាំទីក្នុងការទទួលជ័យជម្នះ២លើកនៃយុទ្ធនាការនេះ បន្ទាប់ពី Thibaut Courtois បានទទួលការវះកាត់លើសរសៃឆ្អឹងដែលដាច់នៅជង្គង់ខាងឆ្វេងរបស់គាត់ ៕ ដោយ៖ ភារៈ
(រូបភាព ៖ Reuters/CNA)
