សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក នេត្រ ភក្រ្តា រដ្ឋមន្ត្រីក្រសួងព័ត៌មាន នាព្រឹកថ្ងៃទី២៥ ខែសីហា ឆ្នាំ២០២៣នេះ បានអញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រី ព្រមទាំងពិនិត្យមើលសកម្មភាពការងារ នៅអគ្គនាយកដ្ឋានវិទ្យុជាតិកម្ពុជា (RNK) នៅរាជធានីភ្នំពេញ។
ជាមួយគ្នានេះ លោក នេត្រ ភក្រ្តា រដ្ឋមន្ត្រីក្រសួងព័ត៌មាន នៅថ្ងៃដដែល បានអនុញ្ញាតឱ្យលោក YAMANA Hiroo នាយកប្រតិបត្តិទទួលបន្ទុកការគ្រប់គ្រងប្រព័ន្ធផ្សព្វផ្សាយទូទៅ នៃទូរទស្សន៍ NHK របស់ប្រទេសជប៉ុន និងសហការី ចូលជួបសម្ដែងការគួរសម និងពិភាក្សាការងារ នៅទីស្តីការក្រសួង រាជធានីភ្នំពេញ។
សូមជម្រាបជូនថា លោក នេត្រ ភក្ត្រា បន្ទាប់ពីលោកទទួលបានមុខដំណែងជារដ្ឋមន្ត្រីក្រសួងព័ត៌មាន លោកបានចុះជួបសំណេះសំណាលជាមួយថ្នាក់ដឹកនាំមន្ត្រីរាជការ នៅតាមអគ្គនាយកដ្ឋាន ដេីម្បីបង្កេីនភាពសិទ្ធស្នាល និងបានសម្តែងការកោតសរសើរចំពោះ មន្ត្រីរាជការនៃអគ្គនាយកនាយកដ្ឋានផ្សេងៗ ដែលបានខិតខំប្រឹងប្រែង ក្នុងការបំពេញការងារ តាមតួនាទីរៀងៗខ្លួនៗ ប្រកបដោយការទទួលខុសត្រូវខ្ពស់។
គួរបញ្ជាក់ថា លោករដ្ឋមន្ត្រី នេត្រ ភក្ត្រា បានថ្លែងកាលពីម្សិលមិញនេះដែរថា លោក នឹងឆ្លៀតពេលចុងសប្តាហ៍ ដើម្បីចំណាយពេលវេលាបង្រៀនមន្ត្រីនាយកដ្ឋានព័ត៌មាន ពីរបៀបសរសេរព័ត៌មានប្រកបដោយគុណភាពសំខាន់ខ្លីខ្លឹម និងខ្លាំង៕ ដោយ៖សហការី
រូបថត៖ ខឹម សុវណ្ណារ៉ា
