សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Richarlison បានស៊ុតបញ្ចូលទី១គ្រាប់ ប៉ុន្តែមិនអាចជួយក្រុមTottenham បានទេ ដោយបានធ្លាក់ចេញពីការប្រជែងពានរង្វាន់ League Cup ក្រោមថ្វីជើងក្រុម Fulham ក្នុងការស៊ុតបាល់ប៉េណាល់ទីកាត់សេចក្តីដើម្បីឈានទៅជុំទី៣នៃពានរង្វាន់នេះ។
បន្ទាប់ពីគ្រាប់បាល់ចូលទីខ្លួនឯងក្នុងតង់ទីមួយរបស់ Micky van de Ven បានជួយឱ្យ Fulham មានគ្រាប់បាល់នាំមុខនៅនាទីទី១៩ ហើយក្រុមSpurs បានតាមស្មើវិញនៅតង់ទី២ តាមរយៈការស៊ុតបាល់បញ្ចូលទីរបស់ Richarlison នៅនាទីទី៥៦។
ក្រុមម្ចាស់ផ្ទះត្រូវបានកាត់បន្ថយជាបណ្តោះអាសន្នមកត្រឹម១០នាក់នៅពេលដែល Kenny Tete ត្រូវផ្លាស់ប្តូរស្បែកជើងរបស់គាត់ ហើយ Spurs បានមានឱកាសពេញលេញនៅពេលដែល Richarlison ស៊ុតចូល១គ្រាប់នោះ ប៉ុន្តែការស៊ុតបាល់ប៉េណាល់ទីកាត់សេចក្តីរបស់ Davinson Sanchez ត្រូវបានសង្គ្រោះដោយអ្នកចាំទី ខណៈដែលក្រុម Fulham បានឈ្នះការស៊ុតបាល់បញ្ចូលទីចូលទាំង៥គ្រាប់ ហើយ Tottanham ស៊ុតចូលតែ៣គ្រាប់ប៉ុណ្ណោះធ្វើឲ្យលទ្ធផល ៥ទល់៣ ។
ទីបំផុតនេះគឺជាការឈ្នះដែលស័ក្តិសមសម្រាប់ក្រុម Fulham ដែលប្រហែលជាមិនអាចមើលឃើញមុនពេល Richarlison តាមស្មើជាមួយនឹងគ្រាប់បាល់ដំបូងរបស់គាត់ក្នុងរដូវកាលនេះ បន្ទាប់ពីក្រុមម្ចាស់ផ្ទះបាននាំមុខដោយសារបាល់សំណាងខ្សែការពារភ្លាត់ស្នៀតស៊ុតចូលទីខ្លួនឯង។ អ្នកចាំទី Fraser Forster បានធ្វើការសង្គ្រោះដ៏ល្អមួយនៅតង់ទី២ដែរដោយ Rodrigo Muniz ដែលមានឱកាសស៊ុតចំគោលដៅ។
សរុបមកការប្រកួតនេះគឺជាការបរាជ័យនៃការចាប់ផ្តើមរដូវកាលដំបូងរបស់ក្រុម Tottanham ដែលបាត់បង់ឱកាសពានមួយក្នុងចំណោម៣ដែលជាពានរង្វាន់ក្នុងស្រុក។ ក្រុម Tottanham ត្រូវផ្តោតសំខាន់ទៅលើការប្រជែងពានរង្វាន់២ទៀតគឺ FA Cup និង Premier League ខណៈដែលក្រុមនេះមិនទាន់ស្គាល់រសជាតិពាននៅឡើយទេក្នុងរយៈពេលដ៏យូរមកហើយ។ រីឯក្រុម Fulham ក្រោមការដឹកនាំរបស់គ្រូបង្វឹក Marco Silva មានឱកាសក្នុងការឡើងទៅប្រកួតជុំទី៣បន្តទៀតក្រោយពីទទួលបានជ័យជម្នះនេះ ៕
ដោយ៖ ភារៈ(រូបភាព ៖ BBC Sport)
