សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គណៈបញ្ជាការឯកភាពខណ្ឌឫស្សីកែវបានចុះមកធ្វើកិច្ចសន្យាអប់រំ និងផ្អាកអាជីវកម្មបណ្ដោះអាសន្ន និងស្នើអោយម្ចាស់ទីតាំងរោងចក្រទទួលរាប់រងថ្លៃព្យាបាលសេវ៉ាសុខភាពជូនប្រជាពលរដ្ឋដែលរងផលប៉ះពាល់ ។
ប្រតិបត្តិការចុះមករោងចក្រផលិតទឹកកកដើម និងអនាម័យ មានយីហោឈ្មោះ ឈៀង មួ កាលពីព្រឹកថ្ងៃទី២ ខែកញ្ញា ឆ្នាំ២០២៣ មានទីតាំងស្ថិតនៅលើផ្លូវបេតុង ក្រុមទី៥ ភូមិខ១ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ ក្រោយកើតហេតុធ្លាយឧស្ម័នអាម៉ូញ៉ាក់បង្កឲ្យមានផលប៉ះពាល់ដល់ប្រជាពលរដ្ឋ ចំនួន២៩នាក់ ត្រូវបានបញ្ជូនទៅសម្រាកព្យាបាលនៅមន្ទីរពេទ្យ កាលពីយប់មិញនេះ។
លោក ឯក ឃុនដឿន អភិបាលនៃគណៈអភិបាលខណ្ឌនិងលោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឬស្សីកែវ ដែលមានម្ចាស់ទីតាំងមានឈ្មោះ ឈៀង ប៉ោ ភេទប្រុស អាយុ៥៦ឆ្នាំ មានទីលំនៅចំណុចកើតហេតុ។
នាព្រឹកថ្ងៃដដែលនេះលោក ង៉ែត វិបុល អគ្គនាយកក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានដឹកនាំក្រុមការងារពិនិត្យទីតាំងជាក់ស្តែងឃើញថា ទីតាំងខាងលើមានលិខិតអនុញ្ញាតត្រឹមត្រូវពីមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រាជធានីភ្នំពេញ។
-មានកិច្ចការពារបរិស្ថាន ពីមន្ទីរបរិស្ថានរាជធានីភ្នំពេញ។
-មានប័ណ្ណប៉ាតង់ឆ្នាំចុងក្រោយ។
តាមការបញ្ជាក់របស់លោក ឯក ឃុនដឿន អភិបាលនៃគណៈអភិបាលខណ្ឌឫស្សីកែវ បានឲ្យដឹងថាការចុះមកធ្វើកិច្ចសន្យាអប់រំណែនាំដល់ម្ចាស់ទីតាំង
ទី១. ត្រូវពង្រឹងបញ្ហាបច្ចេកទេសឡើងវិញ មិនឲ្យមានជាលើកទី២ឡើយ។
ទី២. ក្នុងករណីមានជាលើកទី២ ត្រូវបិទអាជីវកម្មនេះតែម្ដង ត្រូវឱ្យម្ចាស់ទីតាំងរកទីតាំងថ្មីដែលនៅទីតាំងដាច់ត្រយ៉ាលមិនឲ្យមាននៅក្បែរផ្ទះប្រជាពលរដ្ឋ។
ទី៣. ថ្លៃសម្រាកព្យាបាលរបស់ប្រជាពលរដ្ឋដែលរងគ្រោះត្រូវម្ចាស់ទីតាំងរោងចក្រទឹកកកជាអ្នកចេញថ្លៃព្យាបាលទាំងស្រុង។
គួរបញ្ជាក់ផងដែរ កាលពីម៉ោង៧យប់ ថ្ងៃទី១ ខែកញ្ញា ឆ្នាំ២០២៣ មនុស្សប្រុសស្រីចំនួន២៩នាក់ ខ្លះដួលសន្លប់ ខ្លះទៀតថប់ដង្ហើម និងហូរទឹកភ្នែក ត្រូវបានរថយន្តសាមុយបញ្ជូនទៅសង្គ្រោះនៅមន្ទីរពេទ្យ បន្ទាប់ពីមានការធ្លាយចំហាយ អាម៉ូញាក់ ចេញពីរោងចក្រផលិតទឹកកកមួយកន្លែង ស្ថិតនៅលើផ្លូវជាតិលេខ៥ ភូមិ ក សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។
បច្ចុប្បន្នចំពោះទីតាំងរោងចក្រផលិតទឹកកកនេះត្រូវបានអាជ្ញាធរខណ្ឌឫស្សីកែវផ្អាកអាជីវកម្មបណ្ដោះអាសន្ន និងស្នើអោយម្ចាស់ទីតាំងរោងចក្រទទួលរាប់រងថ្លៃព្យាបាលសេវ៉ាសុខភាពជូនប្រជាពលរដ្ឋដែលរងផលប៉ះពាល់។
ជាមួយគ្នានោះដែរលោកអភិបាលខណ្ឌក៏បានស្នើឲ្យម្ចាស់ទីតាំងត្រូវធ្វើការកែលំអរប្រព័ន្ធសុវត្ថិភាព បច្ចេកទេសឲ្យបានត្រឹមត្រូវមុននឹងដំណើរការឡើងវិញ។
ប្រសិនជាថ្ងៃក្រោយមានការលេចធ្លាយនៅឧស្ម័នអាម៉ូញ៉ាក់ សូម អោយម្ចាស់ទីតាំងទទួលខុសត្រូវទាំងស្រុង ចំពោះមុខច្បាប់៕
ដោយ៖ ជីណា
