សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើតាមលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានឱ្យដឹងថា កម្លាំងនគរបាលទូទាំងប្រទេស បានចុះត្រួតពិនិត្យ និងផាកពិន័យ យានយន្តសរុបចំនួន ១៤គ្រឿងទៀត នៅថ្ងៃទី០៤ ខែកញ្ញា ឆ្នាំ២០២៣នេះ ក្នុងនោះមានម៉ូតូ ១០គ្រឿង និងរថយន្ត ០៤គ្រឿង។
លោកឧត្តមសេនីយ៍ឯក ឆាយ គឹមខឿន បានគូសបញ្ជាក់ថា នគរបាលចរាចរណ៍ទូទាំងប្រទេស នាថ្ងៃទី០៤ កញ្ញានេះ បានត្រួតពិនិត្យ និងផាកពិន័យយានយន្តសរុបចំនួន ១១៧គ្រឿង ក្នុងនោះមានម៉ូតូ ៦២គ្រឿង និងរថយន្តគ្រប់ប្រភេទ ៦១គ្រឿង។
បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក។ ដោយឡែករថយន្តរួមមាន៖ អត់បណ្ណបើកបរ ល្មើសល្បឿន និងល្មើសសញ្ញាជាដើម។
ជាមួយគ្នានេះ សម្រាប់ថ្ងៃទី០៤ ខែកញ្ញានេះដែរ ករណីគ្រោះថ្នាក់ចរាចរណ៍នៅទូទាំងប្រទេសកម្ពុជា ក៏បានកើតឡើងចំនួន ១៤លើក ក្នុងនោះអ្នកស្លាប់ចំនួន ០៥នាក់ របួសចំនួន ១៧នាក់ (របួសធ្ងន់ចំនួន ១១នាក់)។ រយៈពេល ០៤ថ្ងៃមានករណីគ្រោះថ្នាក់ចរាចរណ៍ចំនួន ៤៨លើក បណ្ដាលឱ្យមនុស្សស្លាប់ ១៨នាក់ របួស ១១៨នាក់ (របួសធ្ងន់ ៤៤នាក់)។
បន្ថែមពីនេះ លោកឧត្តមសេនីយ៍ឯក ឆាយ គឹមខឿន បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕
ដោយ៖ សហការី
