សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់សង្ស័យស្រវឹងស្រាខ្លាំងបានបេីករថយន្តឡិចសុីសLX470កៀររថយន្តព្រូសខណៈកំពុងឈប់ភ្លើងស្តុបបណ្តាលឱ្យរងការខូចខាត ហេីយរថយន្តបង្កបានបន្តទៅបុកដេីមឈេីមួយដេីមទៀតទើបទៅមុខលែងរួច ។
ហេតុការណ៍នេះបានកេីតឡេីងកាលពីវេលាម៉ោង១១និង៤០នាទីយប់ថ្ងៃទី៦ ខែកញ្ញា ឆ្នាំ២០២៣ នៅចំណុចភ្លើងស្តុបផ្លូវលេខ៣១០ កែងផ្លូវព្រះមុនីវង្ស ស្ថិតក្នុងសង្កាត់បឹងកេងកងទី២ ខណ្ឌបឹងកេងកង។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញបុរសម្នាក់បេីករថយន្តម៉ាកព្រូស ពណ៌ស ពាក់ស្លាកលេខភ្នំពេញ2BR-5276 ធ្វេីដំណេីរតាមបណ្តោយផ្លូវព្រះមុនីវង្សក្នុងទិសដៅពីត្បូងទៅជេីង ខណៈមកដល់ចំណុចកេីតហេតុក៏បានឈប់ភ្លើងស្តុបពណ៌ក្រហម ភ្លាមនោះស្រាប់តែមានបុរសម្នាក់សង្ស័យជាកម្លាំងនគរបាល ដោយមានឯកសណ្ឋានក្នុងរថយន្តពាក់ស័ក្កិ៥ បេីករថយន្តម៉ាកឡិចស៊ីសLX 470 ពណ៌ទឹកប្រាក់ ពាក់ស្លាកលេខភ្នំពេញ2AB-2610 ទំនងជាស្រវឹងផងនោះធ្វេីដំណេីរមកពីក្រោយកៀររថយន្តព្រូសខាងស្តាំបណ្តាលឱ្យរងការខូចខាត ភ្លាមនោះរថយន្តបង្កបានបន្តទៅមុខទាំងបញ្ច្រាសទិសចរាចរណ៍ទៅ
បុកដេីមឈេីមួយដេីមទៀតរងការខូចខាតទៅមុខលែងរួច តែមិនមានមនុស្សរងរបួសនោះទេ។
ក្រោយកេីតហេតុសមត្ថកិច្ចមូលដ្ឋានបានចុះទៅដល់ហើយបានសម្របសម្រួលភាគីទាំងសងខាងដោយភាគីខាងរថយន្តបង្កព្រមទទួលកំហុសចេញថ្លៃជួសជុលទៅភាគីខាងរថយន្តរងគ្រោះដេីម្បីបញ្ចប់រឿងនៅកន្លែងកេីតហេតុ៕
ដោយ៖សុខាសែនជ័យ
