សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើតាមលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែងឱ្យដឹងនៅល្ងាចថ្ងៃទី០៧ ខែកញ្ញា ឆ្នាំ២០២៣នេះថា៖ នគរបាលទូទាំងប្រទេសត្រួតពិនិត្យ និងផាកពិន័យ យានយន្តសរុបចំនួន ២៩៣គ្រឿងទៀត ក្នុងនោះមានម៉ូតូ ២៦០គ្រឿង និងរថយន្ត ៣៣គ្រឿង ខណៈមនុស្ស៣នាក់ស្លាប់ និងរបួស១៤នាក់ នៅថ្ងៃទី០៧ ខែកញ្ញា ឆ្នាំ២០២៣នេះ។
លោកឧត្តមសេនីយ៍ឯក ឆាយ គឹមខឿន កម្លាំងនគរបាលចរាចរណ៍ទូទាំងប្រទេស នៅថ្ងៃទី០៧ ខែកញ្ញានេះដែរ បានត្រួតពិនិត្យ និងផាកពិន័យយានយន្តសរុបចំនួន ៧០២គ្រឿង ក្នុងនោះមានម៉ូតូ ១៥៣គ្រឿង និងរថយន្តគ្រប់ប្រភេទ ១៤៦គ្រឿង។
បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក និងអត់ស្លាកលេខជាដើម។ ដោយឡែករថយន្តរួមមាន៖ អត់ស្លាកលេខ ស្រវឹង ល្មើសល្បឿន និងល្មើសសញ្ញាជាដើម។
គួរបញ្ជាក់ថា សម្រាប់ថ្ងៃទី០៧ ខែកញ្ញា ឆ្នាំ២០២៣នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ១០លើក ក្នុងនោះអ្នកស្លាប់ចំនួន ០៣នាក់ របួសចំនួន ១៤នាក់ (របួសធ្ងន់ចំនួន ០៩នាក់)។ រយៈពេល ០៧ថ្ងៃមានករណីគ្រោះថ្នាក់ចរាចរណ៍ចំនួន ៨១លើក បណ្ដាលឱ្យមនុស្សស្លាប់ ២៨នាក់ របួស ១៧០នាក់ (របួសធ្ងន់ ៧៩នាក់)។
ជាមួយគ្នានេះ លោកអ្នកនាំពាក្យ ក៏បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕
ដោយ៖ សហការី
