សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក កេីត ឆែ អភិបាលរងរាជធានីភ្នំពេញបានបញ្ជាក់ថា បច្ចុប្បន្នការសាងសង់ស្ពានបេតុងខ្សែកាប្លិ៍ភ្ជាប់ពីទីក្រុងកោះពេជ្រទៅទីក្រុងកោះនរា បានសម្រេចប្រមាណ៩២ភាគរយ ហេីយនៅថ្ងៃទី១២ ខែកញ្ញា ឆ្នាំ២០២៣ លោក អភិបាលរាជធានីភ្នំពេញនឹងអញ្ជេីញចូលរួមជាគណៈអធិបតីក្នុងពិធីតភ្ជាប់ស្ពានបេតុងខ្សែកាប្លិ៍នេះ ។
លោក កេីត ឆែ បានបញ្ជាក់ឱ្យដឹង កាលពីថ្ងៃទី៨ កញ្ញា ២០២៣ថា តាមផែនការ ស្ពានខ្សែកាប្លិ៍នេះគ្រោងនឹងបញ្ចប់នៅពាក់កណ្តាលខែវិច្ឆិកា ឆ្នាំ ២០២៣ មុនព្រះរាជពិធីបុណ្យអុំទូក ។
ស្ពានថ្មីនេះនឹងភ្ជាប់ចរាចរណ៍ពីតំបន់ភូមិសាស្ត្រក្នុងរាជធានីទៅកាន់តំបន់ភូមិសាស្ត្រខណ្ឌច្បារអំពៅ ផ្លូវជាតិលេខ១ ដើម្បីកាត់បន្ថយការកកស្ទះចរាចរណ៍នៅលើស្ពានព្រះមុនីវង្សទាំងពីរ។
សូមបញ្ជាក់ថា ស្ពានឆ្លងកាត់ទន្លេបាសាក់ភ្ជាប់ពីកោះពេជ្រទៅកាន់ទីក្រុងរណបកោះនរា បានបើកការដ្ឋានកាលពីថ្ងៃទី២៦ ខែតុលា ឆ្នាំ២០២០។ ស្ពានមានប្រវែង ៨២៤ម៉ែត្រ មានទទឹង២៤.៥០ម៉ែត្រ គ្រោងសាងសង់៣៥ខែ ដោយចំណាយថវិកា៣៨លានដុល្លារ ដែលជាថវិកាបដិភាគ វិនិយោគរបស់ក្រុមហ៊ុនOCIC រួមជាមួយថវិការបស់រដ្ឋបាលរាជធានីភ្នំពេញ ។ នេះជាសមិទ្ធផលថ្មីមួយទៀតដែលរដ្ឋបាលរាជធានីភ្នំពេញសម្រេចបាន ទុកសម្រាប់ឱ្យកូនចៅជំនាន់ក្រោយប្រើប្រាស់សម្រាប់ផលប្រយោជន៍រួម និងក៏ដើម្បីលើកកម្ពស់ជីវភាពប្រជាពលរដ្ឋបានមួយកម្រិតថែមទៀតផងដែរ ៕
ដោយ ៖ សំរិត
