សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ លោកវរសេនីយ៍ឯក ទេព ពុំសែន អធិការនគរបាលស្រុកពួក បានឱ្យដឹងនៅព្រឹកថ្ងៃទី១៥ ខែកញ្ញា ឆ្នាំ២០២៣នេះថា៖ ផ្ទះប្រជាពលរដ្ឋមួយខ្នង ត្រូវបានបំផ្លាញដោយសារភ្លៀងមួយមេធំ លាយឡំនិងខ្យល់កន្ត្រាក់ បណ្តាលឱ្យរលំបាក់ផ្ទះទាំងស្រុង និងធ្វេីឱ្យមនុស្ស ៣នាក់រងរបួសផងដែរ។
លោកអធិការស្រុកពួក បានឱ្យដឹងទៀតថា ករណីគ្រោះធម្មជាតិនេះ បានកើតឡើងវេលាម៉ោង ៤និង៥០ នាទី រសៀល ថ្ងៃទី១៤ ខែកញ្ញាម្សិលមិញ ស្ថិតនៅភូមិប្រាសាទ ឃុំដូនកែវ ស្រុកពួក ខេត្តសៀមរាប។ ដោយម្ចាស់ផ្ទះ ឈ្មោះ អឿន ញិក ភេទប្រុស អាយុ ៦៥ឆ្នាំ មុខរបរកសិករ ជាបុរសពោះម៉ាយ ។ ក្នុងគ្រួសារជនរងគ្រោះ សរុបសមាជិក ចំនួន ៦នាក់ ក្មេង ២នាក់ ។
លោកវរសេនីយ៍ឯក ទេព ពុំសែន បានបញ្ជាក់ថា ទ្រព្យសម្បត្តិ និងការខូចខាត: ផ្ទះមានទំហំ ៧ គុណនឹង ៨ ម៉ែត្រ ជញ្ជាំងស្លឹក ប្រក់ក្បឿង (កម្ពស់ពីដី ២,៥ ម៉ែត្រ ស្លាប ជញ្ជាំង ៤ ម៉ែត្រ) បានដួលរាបដល់ដី (ខូចខាតទាំងស្រុង) សរុបទឹកប្រាក់ប្រហែល ១២.០០០.០០០ រៀល (ដប់ពីរលានរៀល) ។
ក្នុងនោះដែរ បណ្ដាលឱ្យគ្រោះថ្នាក់ដល់មនុស្សចំនួន ៣ នាក់រួមមាន៖ ទី១,ឈ្មោះ អឿន ញិក ភេទប្រុស រងរបួសរលាត់ក្បាល។ ទី២,ក្មេងប្រុសម្នាក់ អាយុ១ឆ្នាំ រងរបួសពកចិញ្ចើម។ និងទី៣,ឈ្មោះ ញិក ម៉ាប់ ភេទស្រី អាយុ ៣៧ ឆ្នាំ (ម្តាយក្មេង) ។
ក្រោយកេីតហេតុកម្លាំងសមត្ថកិច្ច ក៏បានចុះជួយអន្តរាគមន៍ ដេីម្បីសម្របសម្រួលលំនៅដ្ឋានរបស់ពួកគាត់ផងដែរ៕
ដោយ៖ សហការី
