សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានជិះម៉ូតូមួយគ្រឿងយ៉ាងលឿននិងមិនប្រយ័ត្នក៏ជ្រុលទៅបុកសត្វគោមួយហ្វូងកំពុងតែដើរឆ្លងផ្លូវ បណ្ដាលឱ្យដួលបោកក្បាលស្លាប់ភ្លាមៗ រីឯគោមួយក្បាលក៏ងាប់នៅនឹងកន្លែងផងដែរ ដែលហេតុកការណ៍នេះបង្កការភ្ញាក់ផ្អើលកាលពីវេលាម៉ោង ១១និង ១០ នាទីយប់ថ្ងៃទី ៣០ ខែកញ្ញា ឆ្នាំ ២០២៣ នៅតាមបណ្ដោយផ្លូវ ៥០ ម៉ែត្រស្ថិតនៅភូមិព្រែកប្រណាក សង្កាត់ជើងឯក ខណ្ឌដង្កោ។
សពបុរសរងគ្រោះមិនទាន់ស្គាល់អត្តសញ្ញាណនៅឡើយទេ។
យោងតាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកើតហេតុមានរថយន្តមួយគ្រឿងមិនចាំម៉ាកបានធ្វើដំណើរតាមបណ្ដោយផ្លូវ៥០ម៉ែត្រក្នុង ទិសដៅពីលិចទៅកើត ខណៈមកដល់ចំណុចកើតហេតុក៏បានបង្អង់ល្បឿនឱ្យសត្វគោដើរឆ្លងផ្លូវ ពេលនោះដែរក៏មានបុរសជាជនរងគ្រោះខាងលើបានជិះម៉ូតូមួយគ្រឿង ម៉ាក KING ពណ៌ខ្មៅពាក់ផ្លាកលេខ ភ្នំពេញ 1KG- 6201 ធ្វេីដំណេីរតាមបណ្ដោយផ្លូវ៥០ម៉ែត្រក្នុងទិសដៅពីកើតទៅលិចក្នុងល្បឿនលឿន និងមិនប្រយ័ត្នក៏ជ្រុលទៅបុកហ្វូងគោកំពុងតែដើរឆ្លងផ្លូវបណ្ដាលឱ្យគោមួយក្បាលងាប់នៅនឹងកន្លែង ចំណែកបុរសជាអ្នកជិះម៉ូតូដួលបោកក្បាលនឹងថ្នល់ស្លាប់ក្នុងថ្លុកឈាមយ៉ាងអាណោចអាធ័មបំផុត។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់កន្លែងកេីតហេតុ និងសហការជាមួយសមត្ថកិច្ចជំនាញចរាចរណ៍ខណ្ឌដង្កោចុះមកធ្វើការវាស់វែងយកម៉ូតូនិងសត្វគោមករក្សាទុកនៅអធិការដ្ឋានខណ្ឌដង្កោដើម្បីឱ្យម្ចាស់គោចូលខ្លួនមកដោះស្រាយជាមួយនឹងសាច់ញាតិជនរងគ្រោះនាពេលក្រោយ។ ដោយឡែកសពជនរងគ្រោះ ត្រូវបានសមត្ថកិច្ចដឹកមកតម្កល់នៅវត្តសំបួរមាសដើម្បីស្វែងរកសាច់ញាតិមកយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
