សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តម៉ាកហុីយ៉ាន់ដាយធុនធំមួយគ្រឿង បានបេីកបុកចំហៀងខាងក្រោយរថយន្តម៉ាកតូយ៉ូតាព្រូសមួយគ្រឿងដែលបេីកកាត់ពីមុខបណ្ដាលឱ្យរថយន្តវិលក្បាលបកមកក្រោយវិញរងការខូចខាតយ៉ាងដំណំ កាលពីវេលាម៉ោង១១ និង៣០នាទីព្រឹកថ្ងៃទី១២ ខែតុលា ឆ្នាំ២០២៣ នៅតាមបណ្ដោយផ្លូវទ្រង់មាន់(ផ្លូវ៣០ម៉ែត្រ) ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេឃេីញរថយន្តម៉ាក តូយ៉ូតា ព្រូស ពណ៌ទឹកមាស ពាក់ផ្លាកលេខ ភ្នំពេញ 2AY-3985 បេីកបរតាមបណ្ដោយផ្លូវ៣០ម៉ែត្រ ទិសដៅពីត្បូងទៅជេីងក្នុងល្បឿនលឿនល្មម ។ ជាមួយគ្នានោះក៏មានរថយន្តម៉ាក ហុីយ៉ាន់ដាយ មួយគ្រឿងទៀត ពណ៌ស ពាក់ផ្លាកលេខ កំពង់ចាម 3A-6354 បានបេីកទទឹមគ្នា ប៉ុន្តែពេលនោះរថយន្តម៉ាកតូយ៉ូតាព្រូស បានវ៉ាមកឆ្វេងដៃវិញតែមិនផុតក៏ត្រូវរថយន្តហុីយ៉ាន់ដាយបុកចំហៀងពីក្រោយវិលក្បាលរថយន្តព្រូសត្រឡប់ក្រោយវិញរងការខូចខាតយ៉ាងដំណំ ។
គួរបញ្ជាក់ថា ករណីគ្រោះថ្នាក់ចរាចរណ៍ខាងលេីនេះមិនបណ្ដាលឱ្យមនុស្សណាម្នាក់រងរបួសនោះទេ ប៉ុន្តែជជែកដោះស្រាយគ្នាមិនត្រូវ ទេីបអាជ្ញាធរមូលដ្ឋានចុះមកដល់សហការជាមួយមន្ត្រីជំនាញធ្វេីការវាស់វែងយករថយន្តទាំងពីរគ្រឿងនេះយកទៅរក្សាទុកបណ្ដោះអាសន្ននៅអធិការដ្ឋាននគរបាលខណ្ឌសែនសុខ រង់ចាំភាគីទាំងសងខាងចូលខ្លួនដោះស្រាយតាមក្រោយ ៕
ដោយ ៖ ភារ៉ា ដង្កោ
