សារព័ត៌មាន នគរវត្ត តែងតែនាំមុខគេជានិច្ច
ព័ត៌មាន AFP នៅថ្ងៃអាទិត្យ ទី៥ ខែវិច្ឆិកា ឆ្នាំ២០២៣ បានផ្សាយថា រុស្ស៉ីបានប្រកាសថា ខ្លួនបានធ្វើការបាញ់តេស្តដោយជោគជ័យ នូវមីស៉ីលបាលិស្ទីគអន្តរទ្វីប (ICBM) ដែលអាចបំពាក់ក្បាលគ្រាប់នុយក្លេអ៊ែរចេញពីនាវាមុជទឹកថ្មីរបស់ខ្លួន។
ក្រសួងការពារជាតិរុស្ស៉ីបាននិយាយក្នុងសេចក្តីថ្លែងការណ៍ថា នាវាមុជទឹកយុទ្ធសាស្រ្តថ្មីដើរដោយថាមពលនុយក្លេអ៊ែរ Emperor Alexander III បានបាញ់សាកល្បងដោយជោគជ័យនូវមីស៉ីល ICBM Bulava។ ការធ្វើតេស្តនោះ ត្រូវបានធ្វើឡើងចេញពីទីតាំងមួយនៅដែនសមុទ្រស ដែលស្ថិតនៅក្បែរឆ្នេរភាគពាយព្យប្រទេសរុស្ស៉ី ឆ្ពោះទៅកាន់គោលដៅដែលស្ថិតនៅចម្ងាយរាប់ពាន់គីឡូម៉ែត្រ នៅឯឧបទ្វីប Kamchatka នៃតំបន់ចុងបូព៌ា
រុស្ស៉ី។ យ៉ាងណាមិញ ពុំមានការបញ្ជាក់ថា ការធ្វើតេស្តបានប្រព្រឹត្តទៅកាលពីពេលណាឡើយ។
ការធ្វើតេស្តបាញ់មីស៉ីលដែលមានសមត្ថភាពបំពាក់នុយក្លេអ៊ែរខាងលើ កើតមានឡើងបន្ទាប់ពីរុស្ស៉ីទើបតែបានលុបចោលការផ្តល់សច្ចាប័ន ចំពោះសន្ធិសញ្ញាហាមហាត់ការធ្វើតេស្តបំផ្ទុះនុយក្លេអ៊ែរ ក្នុងសប្តាហ៍នេះ។ នាវាមុជទឹក Emperor Alexander III ត្រូវបានដាក់ទៅលើផ្ទៃទឹកកាលពីខែធ្នូ ឆ្នាំ២០២២ ក្រោយការសាងសង់រួចរាល់ ដើម្បីឆ្លងកាត់ការធ្វើតេស្ត។
នាវាមុជទឹកខាងលើមានបំពាក់មីស៉ីល Bulava សរុប១៦គ្រាប់។ មីស៉ីល ICBM នេះ មានប្រវែង១២ម៉ែត្រ និងរយៈចម្ងាយធ្វើដំណើរខ្ទង់៨,០០០គីឡូម៉ែត្រ ហើយអាចផ្ទុកក្បាលគ្រាប់នុយក្លេអ៊ែរបានដល់៦គ្រាប់។ វាបានក្លាយជាឆ្អឹងខ្នងផ្នែកខាងជើងទឹក នៃយុទ្ធសាស្រ្តអាវុធនុយក្លេអ៊ែរត្រីមុខគឺជើងគោក អាកាស និងទឹក របស់ប្រទេសរុស្ស៉ី៕ ដោយ៖ ធីរីណា
រូបថត៖ RIA NOVOSTI
