សារព័ត៌មាន នគរវត្ត តែងតែនាំមុខគេជានិច្ច
ខេត្តកែប ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា : យើងមិនអាចដាក់ពងមាន់នៅក្នុងកន្ត្រកតែមួយបានទេ ។ សម្ដេចធិបតីសំដៅថា , មិនត្រូវដាក់ពងមាន់ក្នុងកន្ត្រកតែមួយបានទេ, មានន័យថា រាជរដ្ឋាភិបាលមិនមែនសង្ឃឹមតែលើសេដ្ឋកិច្ច លើវិស័យទេសចរណ៍មួយមុខទេ ត្រូវគិតលើគ្រប់វិស័យ ។ ដូចជាសម័យកូវីដ19 វិស័យទេសចរណ៍ត្រូវបានជាប់គាំង នៅក្នុងប្រទេស ក្នុងតំបន់ និងសកលលោក ។ ប៉ុន្តែដោយមានការគ្រប់គ្រងប្រកបដោយគតិបណ្ឌិតរបស់សម្ដេចតេជោ ហ៊ុនសែន នាយករដ្ឋមន្ត្រី នីតិកាលទី៦ កន្លងទៅ បានគ្រប់គ្រងបញ្ហាកូវីដ១៩ បានតាមរយៈការចាក់វ៉ាក់សាំង ។
សម្តេចធិបតី ហ៊ុន ម៉ាណែត បន្តថា , សូមកោតសរសើរចំពោះលោករដ្ឋមន្ត្រីក្រសួងទេសចរណ៍ ដែលបានគ្រប់គ្រងលើវិស័យទេសចរណ៍បានល្អ ។ សម្ដេចជំរុញ ឱ្យតំបន់ទេសចរណ៍នីមួយៗ ក្នុងក្របខ័ណ្ឌទូទាំងប្រទេស នីតិកាលទី៧ មានការអភិវឌ្ឍន៍ ការផលិត ការដាំដុះ រក្សាវត្ថុបុរាណ ច្នៃប្រឌិត វត្ថុអនុស្សាវរីយ៍ ដើម្បីឲ្យប្រជាពលរដ្ឋ មានឱកាស លក់ដូរ ទទួលបានថវិកា តាមរយៈភ្ញៀវទេសចរណ៍ជាតិ អន្តរជាតិ ។
សម្តេចធិបតី ហ៊ុន ម៉ាណែត បានថ្លែងថា , កំណើនភ្ញៀវទេសចរណ៍ មានការរីកចម្រើន តាមរយៈការលើកតម្កើងកិត្តិនាមរបស់ជាតិ។ ដោយសារការផ្សព្វផ្សាយ គេស្គាល់កម្ពុជាខ្លាំង តាមរយៈប្រាសាទអង្គរវត្ត។ ចំពោះសេដ្ឋកិច្ចជាតិ ខ្លាំងណាស់លើវិស័យទេសចរណ៍ យើងមានប្រាសាទអង្គរវត្ត ជានិមិត្តរូប នៃប្រទេសជាតិ និងទាមទារឲ្យមានគោលដៅទេសចរណ៍ជាច្រើនដោយសំបូរបែប រួមទាំងព្រឹត្តិការណ៍ផ្សេងៗជាច្រើន។
សម្ដេចធិបតី ហ៊ុន ម៉ាណែត បានបញ្ជាក់ថា, ព្រឹកមិញនេះនៅប្រាសាទអង្គរវត្ត មានភ្ញៀវទេសចរណ៍ជាង 1 ម៉ឺននាក់ចូលរួម រត់ម៉ារ៉ាតុង ក្នុងនោះមានភ្ញៀវទេសចរបរទេសជាង 4000 នាក់។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ថ្លែងបែបនេះខណៈអញ្ជើញជា អធិបតីភាពដ៏ខ្ពង់ខ្ពស់បំផុត ក្នុងកម្មវិធី បិទជាផ្លូវការ បុណ្យសមុទ្រ លើកទី១០ ជុំទី៣ ឆ្នាំ២០២៣ ក្រោមប្រធានបទ “ទាំងអស់គ្នាដើម្បីទេសចរណ៍” នារសៀលថ្ងៃទី០៣ ខែធ្នូ ឆ្នាំ២០២៣ នៅខេត្តកែប
គួរជម្រាបថា ការរៀបចំពិធីបុណ្យសមុទ្រមានគោលបំណង នៃពិធិបុណ្យសមុទ្រ គឺដើម្បីរួមគ្នាអភិរក្សការពារធនធានធម្មជាតិសមុទ្រ និងថែរក្សាបរិស្ថានឆ្នេរឲ្យបានស្អាត ដើម្បីបម្រើដល់ការអភិវឌ្ឍទេសចរណ៍ប្រកដោយចិរភាព និងការទទួលខុសត្រូវ ព្រមទាំងលើកតម្កើងការផ្សព្វផ្សាយគោលដៅទេសចរណ៍តំបន់ឆ្នេរកម្ពុជា ឱ្យកាន់តែទូលំទូលាយទាក់ទាញទេសចរជាតិ និងអន្តរជាតិមកទស្សនាកាន់តែច្រើន។
ពិធីបុណ្យសមុទ្រត្រូវបានធ្វើឡើង៩លើករួចមកហើយ នៅតាមខេត្តទាំង៤ ដែលជាប់សមុទ្រកម្ពុជា ហើយលើកទី១០ នៅខេត្តកែបនេះ ធ្វើឡើងក្រោមប្រធានបទ «ទាំងអស់គ្នាដើម្បីទេសចរណ៍»។
ចំពោះកម្មវិធីនានាក្នុងពិធីបុណ្យសមុទ្រ រួមមាន៖ ការរៀបចំសិក្ខាសាលា ការដាំដើមឈើ ការប្រារព្ធពិធីបើកជាផ្លូវការនូវពិធីបុណ្យសមុទ្រ។ រីឯសកម្មភាពសម្រាប់ការទស្សនាកម្សាន្តសំខាន់ៗ មានការសម្តែងសិល្បៈ ការប្រគំតន្ត្រី និងការបាញ់កាំជ្រួចអបអរសាទរ មហោស្រពម្ហូបអាហារ ភេសជ្ជៈ ការបង្ហាញសមិទ្ធផលនិងគម្រោងអភិវឌ្ឍន៍ទេសចរណ៍តំបន់ឆ្នេរ និងការតាំងពិព័រណ៍ផលិតផលក្នុងស្រុកនិងអន្តរជាតិ សកម្មភាពកីឡាលើទឹក លើឆ្នេរ រត់ប្រណាំង និងជិះកង់ ក៏មានដែរនូវការរៀបចំឱ្យមានសួនខ្លែងជ្រោយសមុទ្រ ទីឋានមនោរម្យ (បញ្ចាំងភាពយន្ត) ក្រុងកែបសិប្បនិមិ្មត (បង្ហោះគោម) ទស្សនីយភាពសិល្បៈ (ក្រុមសិល្បករ សិល្បការិនីជាតិ និងអន្តរជាតិ ចិន ឥណ្ឌា និងវៀតណាមសរុប៣៣០នាក់) ៕
ដោយ ៖ សិលា
