សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ប្រជាកសិករនៅក្នុងខេត្តកំពង់ឆ្នាំង សម្រេចការប្រមូលទិន្នផលស្រូវវស្សាបាន ៩២%ហើយ គិតត្រឹមពាក់កណ្តាលខែធ្នូនេះ ។
ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ឆ្នាំង លោក ងិន ហ៊ុន បានឲ្យដឹងថា គិតត្រឹមថ្ងៃទី១៤ ធ្នូ ២០២៣នេះ នៅទូទាំងខេត្តកំពង់ឆ្នាំង ប្រជាកសិករសម្រេចប្រមូលផលស្រូវវស្សាបានចំនួន ១៣ម៉ឺន ១ពាន់ ៧៧៣ហិកតា ស្មើនឹង៩២,១៤% នៃផែនការដែលអនុវត្តបានលើផ្ទៃដីចំនួន ១៤ម៉ឺន ៣ពាន់ ៥ហិកតា ។ ចំណែកទិន្នផលស្រូវដែលទទួលបានជាមធ្យមបានចំនួន៣ ៤០០គីឡូក្រាម ក្នុង១ហិកតាផងដែរ។
ចំពោះតម្លៃស្រូវក្នុងឆ្នាំនេះ ត្រូវបានលោកប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ឆ្នាំង បញ្ជាក់ថា ចំពោះស្រូវខ្សាយចំរុះហាលស្ងួតមានតម្លៃ ១.៣០០រៀល ក្នុង ១គីឡូក្រាម គឺកើនឡើង ៤០០រៀល ទៅ៥០០រៀល ប្រៀបធៀបនឹងឆ្នាំមុនដែលមានតម្លៃត្រឹមតែ ៨០០ ទៅ៩០០រៀលប៉ុណ្ណោះ ក្នុង១គីឡូក្រាម ។ ចំណែកស្រូវផ្ការំដួលហាលស្ងួតមានតម្លៃ ១.៥០០រៀល ក្នុង ១គីឡូក្រាម គឺកើនឡើង ៤០០រៀល បើប្រៀបធៀបនឹងឆ្នាំមុនៗ ដែលមានតម្លៃត្រឹមតែ ១គីឡូ ១.១០០រៀលប៉ុណ្ណោះ ក្នុង១គីឡូក្រាម ។
លោកប្រធានបានបញ្ជាក់បន្ថែមទៀតថា តម្លៃស្រូវក្នុងសប្តាហ៍នេះ គឺស្រូវក្រអូប(ស្ងួត) តម្លៃ ១,៥៦០រៀលក្នុង ១គីឡូក្រាមដែលខ្ពស់ជាងឆ្នាំ២០២២ ចំនួន២២០រៀល ក្នុង១គីឡូក្រាម។ ស្រូវចម្រុះ(ស្ងួត) ជាមធ្យមមានតម្លៃ ១,៣៥០រៀល ក្នុង១គីឡូក្រាម ខ្ពស់ជាងឆ្នាំ២០២២ ចំនួន ១០០រៀល ក្នុង១គីឡូក្រាម និងស្រូវ IR (សើម) តម្លៃ ៩៩០រៀល ក្នុង ១គីឡូក្រាម ខ្ពស់ជាងឆ្នាំ២០២២ ចំនួន ១៨០រៀល ក្នុង១គីឡូក្រាម៕
ដោយ៖ សូរិយា
