សារព័ត៌មាន នគរវត្ត តែងតែនាំមុខគេជានិច្ច
រសៀលថ្ងៃទី២៣ ខែធ្នូ ឆ្នាំ២០២៣ ប៊ែលធី គ្រុប បានរៀបចំ សន្និបាតបូកសរុបលទ្ធផលការងារឆ្នាំចាស់ ២០២៣ និងលើកទិសដៅអនុវត្តឆ្នាំ២០២៤ ដែលមានគណៈគ្រប់គ្រង បុគ្គលិក សាស្រ្តាចារ្យ និងលោកគ្រូ-អ្នកគ្រូ ចូលរួមចំនួន ៣,៧៩៣នាក់ នៅសាកលវិទ្យាល័យ ប៊ែលធី អន្តរជាតិទី២(ស្ពានអាកាសចោមចៅ) ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត លី ឆេងតំណាងរាស្រ្តមណ្ឌលរាជធានីភ្នំពេញ ស្ថាបនិក និងជាអគ្គនាយក ប៊ែលធី គ្រុប និង លោកជំទាវ ។
ឯកឧត្តម លី ប៊ុនឆៃ អគ្គនាយករងប៊ែលធី គ្រុប និងជាប្រធានគណៈគ្រប់គ្រងនាយកសាខា បានឱ្យដឹងថា បច្ចុប្បន្ន ប៊ែលធី គ្រុប មានគណៈគ្រប់គ្រងបុគ្គលិក សាស្រ្តាចារ្យ លោកគ្រូ-អ្នកគ្រូបម្រើការ ៣,៧៩៣នាក់ សិស្ស-និស្សិតកំពុងសិក្សា ៦៣,៣២៦នាក់ និងមាន ៣១ទីតាំង ក្នុងនោះ ២៩ទីតាំងជាសាលានិង២ទីតាំង ជាសាកលវិទ្យាល័យ។ ប៊ែលធី គ្រុប មានបម្រើសេវាកម្ម ៣ធំៗដូចជា I. ប៊ែលធីសំណង់ II. ប៊ែលធីទេសចរណ៍ និង III. ប៊ែលធីអប់រំ ដែលចែកចេញជា ៤ផ្នែកគឺ ១-សាលា ប៊ែលធី អន្តរជាតិ ២-សាកលវិទ្យាល័យ ប៊ែលធី អន្តរជាតិ ៣-ប៊ែលធី ទំនាក់ទំនងអន្តរជាតិ និង ៤-មជ្ឈមណ្ឌលតេស្តអន្តរជាតិព្រមទាំងមាន មូលនិធិសប្បុរសធម៌ ប៊ែលធី ផងដែរ។
ក្នុងឆ្នាំ២០២៣ ប៊ែលធី គ្រុប សម្រេចបាននូវសមិទ្ធផលធំៗ ដូចជា៖
I. ប៊ែលធីសំណង់ បានសាងសង់អគារប៊ែលធីទី២៥-២៦ និងកំពុងសាងសង់អគារប៊ែលធីទី២៧-២៨–២៩ និងស្នាក់ការកណ្តាលប៊ែលធី គ្រុប
II. ប៊ែលធីទេសចរណ៍ មានរថយន្តទំនើបៗ ១៦គ្រឿង ក្នុងនោះ ៤៥កៅអី =១២គ្រឿង, ២៥កៅអី =២គ្រឿង, ១៥កៅអី =២គ្រឿងសម្រាប់ដឹកសិស្ស-និស្សិត និងភ្ញៀវទៅទស្សនានៅតំបន់នានាទូទាំងប្រទេស។
III.សាលា ប៊ែលធី អន្តរជាតិ សិស្សបញ្ចប់ការសិក្សា និងប្រឡងជាប់ជាស្ថាពរ ២៨,២៦៦នាក់ ក្នុងនោះបានចែកចេញជា៖
–សិស្សចំណេះទូទៅ (ថ្នាក់ទី១២) ចំនួន ១៨,៩៣៥នាក់ ជាប់១៦,៥១២នាក់ ស្មើនឹង ៨៧.២% និទ្ទេស A ចំនួន ៣៩៧នាក់
–សិស្សភាសាអង់គ្លេសកម្រិត១២ (Level 12) ចំនួន ១១,៧៥៤នាក់បានពិន្ទុតេស្តអន្តរជាតិអាយអិល (IELTS) ៥.០ឡើង ៨,៨១៦នាក់ ស្មើនឹង៧៥%
IV.សាកលវិទ្យាល័យ ប៊ែលធី អន្តរជាតិ និស្សិតបញ្ចប់ការសិក្សាទាំងកម្មវិធីសិក្សាជាភាសាជាតិ និងកម្មវិធីសិក្សាអន្តរជាតិ ចំនួន ៣,៣៦៣នាក់ ក្នុងនោះថ្នាក់គរុកោសល្យ ៦៩៧នាក់ បរិញ្ញាបត្ររង ៣៥០នាក់ បរិញ្ញាបត្រ ២,២៧៥នាក់ បរិញ្ញាបត្រជាន់ខ្ពស់ ៣៣៤នាក់ និងថ្នាក់បណ្ឌិត ៧នាក់។
V.ប៊ែលធី ទំនាក់ទំនង អន្តរជាតិ បញ្ជូនសិស្ស–និស្សិតទៅក្រៅប្រទេសចំនួន ១,៣១១នាក់ ក្នុងនោះសិស្ស–និស្សិតអាហារូបករណ៍ឧកញ៉ា លី ឆេង ១៤១នាក់ សិស្ស–និស្សិតបង់ថ្លៃ ៥៨នាក់ និងសិស្ស–និស្សិត ធ្វើទស្សនកិច្ចសិក្សា ១,១១២នាក់។
VI.មជ្ឈមណ្ឌលតេស្តអន្តរជាតិ ប៊ែលធី បានទទួលសិទ្ធិរៀបចំតេស្តអន្តរជាតិធំៗ ៤ ៖ ១-តេស្តថូហ្វល (TOEFL) ពីអាមេរិក, ២-តេស្តអាយអ៊ែល (IELTS) ពីអង់គ្លេស, ៣-តេស្ត GRE (ជីអអ៊ី) ពីអាមេរិក និង ៤-តេស្ត SELT (អេស-អ៊ី-អែល-ធី) ពីអង់គ្លេស និងមានសិស្ស-និស្សិតចូលរួមប្រឡង ១,៦២៦នាក់។
ទិសដៅការងារសម្រាប់អនុវត្តឆ្នាំ២០២៤
ឆ្នាំ២០២៤នេះ ប៊ែលធី គ្រុប បានសម្រេចដាក់ចេញនូវផែនការយុទ្ធសាស្ត្រ រួមមាន៖
១–ពង្រឹងរចនាសម្ព័ន្ធដែលមានស្រាប់ និងយន្តការគ្រប់គ្រងឱ្យបានកាន់តែល្អប្រសើរបន្ថែមទៀត
២-ថ្នាក់ដឹកនាំ និងបុគ្គលិក ត្រូវស្គាល់ខ្លួនឯង (Who am I?) និងស្គាល់ពីតួនាទី ភារកិច្ច និងការទទួលខុសត្រូវ ទៅតាមការចាត់តាំងរបស់ថ្នាក់លើ
៣-ពង្រឹងការគោរពបទបញ្ជាផ្ទៃក្នុង និងច្បាប់រដ្ឋជាធរមានឱ្យបានកាន់តែល្អប្រសើរ និងកែសម្រូលបទបញ្ជាផ្ទៃក្នុងមួយចំនួន ដើម្បីឱ្យស្របតាមការរីកចម្រើនរបស់ក្រុមហ៊ុន និងការអភិវឌ្ឍរបស់ប្រទេសជាតិ
៤–ពង្រឹងវិន័យសិស្ស និស្សិតនៅគ្រប់កម្រិត និងបង្កើនទំនាក់ទំនងល្អជាមួយមាតាបិតា អាណាព្យាបាលសិស្ស និស្សិត
៥–បន្តអភិវឌ្ឍប្រព័ន្ធគ្រប់គ្រង (Management System) គ្រប់ផ្នែកនៃប៊ែលធី គ្រុប ឱ្យបានកាន់តែល្អប្រសើរបន្ថែមទៀត
៦–ពង្រឹងការងារគ្រប់គ្រងចំណូល-ចំណាយឱ្យបានកាន់តែល្អប្រសើរ និងមានប្រសិទ្ធភាពខ្ពស់
៧–ពង្រឹងយន្តការត្រួតពិនិត្យ តាមដានការអនុវត្តសេចក្តីសម្រេច សេចក្តីណែនាំ និងគោលការណ៍នានារបស់ប៊ែលធី គ្រុប ដែលបានដាក់ចុះឱ្យបានកាន់តែមានប្រសិទ្ធភាព និងមានការទទួលខុសត្រូវខ្ពស់
៨–បើកវគ្គបំប៉នគរុកោសល្យបង្រៀនជូនដល់សាស្ត្រាចារ្យ និងលោកគ្រូ-អ្នកគ្រូនៅគ្រប់កម្រិត និងគ្រប់ផ្នែក ដើម្បីបង្កើនសមត្ថភាព និងចំណេះដឹងថ្មី សម្រាប់ការបង្រៀនឱ្យទាន់សម័យឌីជីថល
៩–អភិវឌ្ឍកម្មវិធីសិក្សាជាប្រចាំ ដើម្បីដើរឱ្យទាន់ទីផ្សារការងារ ការវិវឌ្ឍបច្ចេកវិទ្យាឌីជីថល និងការរីកចម្រើនរបស់ប្រទេសជាតិ និងពិភពលោក
១០–បើកថ្នាក់បំប៉នមុខវិជ្ជាសំខាន់ៗជូនសិស្សថ្នាក់ទី១២ ដែលត្រូវប្រឡងបាក់ឌុប និងធ្វើយ៉ាងណាឱ្យជាប់ចាប់ពី ៨៨%-៩៣% និងសិស្សភាសាអង់គ្លេសកម្រិត១២ (Level 12) ត្រូវបានពិន្ទុតេស្តអន្តរជាតិអាយអែល (IELTS) យ៉ាងតិច ៥.០ឡើង ចាប់ពី ៨០% ឡើងទៅ
១១–ពង្រឹងកិច្ចសហប្រតិបត្តិការជាមួយដៃគូដែលបានចុះអនុស្សារណយោគយល់ (MoU) រួចហើយទាំង ១៨ប្រទេស និង ៨០សាកលវិទ្យាល័យនៅលើពិភពលោកឱ្យបានល្អប្រសើរ និងបន្តរៀបចំសន្និសីទកិច្ចសហប្រតិបត្តិការអន្តរជាតិ ប៊ែលធី (BELTEI International Collaboration Conference – BICC) លើកទី៨ នៅខែមិថុនា ឆ្នាំ២០២៤ ខាងមុននេះ ដើម្បីផ្តល់ឱកាសឱ្យសិស្ស-និស្សិតប៊ែលធី ក៏ដូចជាសិស្ស-និស្សិតទូទាំងប្រទេសទៅសិក្សានៅក្រៅប្រទេស តាមរយៈប៊ែលធី ទំនាក់ទំនងអន្តរជាតិ
១២–អភិវឌ្ឍជាប្រចាំនូវបច្ចេកវិទ្យា ប្រព័ន្ធឌីជីថល និង Media ដែលមានស្រាប់ ជាពិសេស Mobile App របស់សាលា ប៊ែលធី អន្តរជាតិ (BELTEI IS App) និងសាកលវិទ្យាល័យ ប៊ែលធី អន្តរជាតិ (BELTEI IU App) វែបសាយ ហ្វេសប៊ុក ព្រមទាំងបណ្តាញសង្គមផ្សេងៗ ដើម្បីជាជំនួយក្នុងការសិក្សាបន្ថែម និងសម្រាប់អ្នកដែលចង់ឈ្វេងយល់អំពីប៊ែលធី គ្រុប ក៏ដូចជាអ្នកដែលចង់សិក្សាទាំងភាសាខ្មែរនិងអង់គ្លេសតាមកម្មវិធីក្រសួងអប់រំ ពីគ្រប់ទីកន្លែងទាំងក្នុងប្រទេស និងក្រៅប្រទេស។
ក្នុងឱកាសនោះដែរ ឯកឧត្តមបណ្ឌិត លី ឆេង អគ្គនាយកប៊ែលធី គ្រុប បានថ្លែងកោតសរសើរចំពោះ គណៈគ្រប់គ្រង បុគ្គលិក សាស្ត្រាចារ្យ និងលោកគ្រូ–អ្នកគ្រូ គ្រប់ផ្នែកទាំងអស់នៃប៊ែលធី គ្រុប ដែលបានខិតខំប្រឹងប្រែងបំពេញភារកិច្ចតាមតួនាទីរៀងៗខ្លួន ដោយអនុវត្តបានតាមគោលការណ៍ និងសេចក្តីសម្រេចនានារបស់ថ្នាក់លើដែលបានដាក់ចុះ និងអនុវត្តបានយ៉ាងហ្មត់ចត់នូវបទបញ្ជាផ្ទៃក្នុង និងលិខិតបទដ្ឋានផ្សេងៗ ព្រមទាំងរក្សាបាននូវវិន័យ និងសេចក្តីថ្លៃថ្នូរគួរជាទីមោទនក្រៃលែង។
ជាទីបញ្ចប់ ឯកឧត្តមបណ្ឌិត និងលោកជំទាវ បានប្រគល់លិខិតតែងតាំងជូនដល់ថ្នាក់ដឹកនាំនៃប៊ែលធីគ្រុប និងពានរង្វាន់ការងារ ប័ណ្ណអាហា–រូបករណ៍ ១០០% និងរង្វាន់លើកទឹកចិត្តជូនដល់បុគ្គលិកបម្រើការងារ ១០ឆ្នាំ សរុបចំនួន ៤០៦នាក់ នាពេលនោះផងដែរ។
