សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ប្រជាពលរដ្ឋ ប្រទះឃើញ នារីពិការ គរថ្លង់ម្នាក់ ស្លាប់ក្នុងទឹកប្រឡាយបង្កការភ្ញាក់ផ្អើលដល់អ្នកធ្វើដំណើរនិងអ្នកភូមិព្រមទាំងរាយកាណ៍មកសមត្ថកិច្ច មកពិនិត្យ សង្ស័យករណីឃាតកម្មនៅស្រុកស្វាយទាប។
ហេតុការណ៍ខាងលើនេះបងកការភ្ញាក់ផ្អើល កាលពីវេលាម៉ោង៨និង១០នាទីព្រឹកថ្ងៃទី២៣ ធ្នូ ឆ្នាំ២០២៤ នៅចំណុចប្រឡាយទឹកក្នុងចំការប្រេងខ្យល់ខាងក្រោយផ្ទះអ្នកស្រុកប្រមាណជាង១០០ម៉ែត្រ ស្ថិតក្នុងភូមិព្រៃទទឹង ឃុំសំបួរ ស្រុកស្វាយទាប ខេត្តស្វាយរៀង ។
បើតាមសមត្ថកិច្ចបានឲ្យដឹងថា នារីរងគ្រោះឈ្មោះ ឡុង រតនា ហៅធុងសាំង អាយុ២៧ឆ្នាំ ជាមនុស្សគ តែអាចស្តាប់ឮ និងចេះសរសេរអក្សរ មុខរបរកម្មករោងចក្រ មានទីលំនៅក្នុងភូមិកើតហេតុខាងលើ ។
តាមប្រភពបន្តថា សង្ស័យមានគេហៅនាង ឲ្យទៅជួបនៅក្នុងចំការប្រេងខ្យល់ក្រោយភូមិ ហើយក៏វាយសម្លាប់រួចយកសពទៅទម្លាក់ចោលក្នុងទឹកប្រឡាយ គួរឲ្យរន្ធត់។
ប្រភពបន្តថា លុះព្រឹកឡើងអ្នកភូមិធ្វើដំណើរតាមផ្លូវភ្លឺប្រឡាយក៏ប្រទះឃើញសាកសពនារីរងគ្រោះអណ្តែតក្នុងទឹកប្រឡាយក៏មានការឆោឡោ ប្តឹងសមត្ថកិច្ចឲ្យមកពិនិត្យនិងអន្តរាគមន៍តែម្តង។
ពាក់ព័ន្ធករណីនេះដែរ លោក សោម សារ៉ន អធិការនគរបាលស្រុកស្វាយទាប បានអោយដឹងនាព្រឹកថ្ងៃទី២៤ខែធ្នូ ឆ្នាំ២០២៤នេះថា ពិតជាមានករណីមនុស្សស្រីស្លាប់ក្នុងទឹកប្រឡាយ ប្រាកដមែន ខណៈសមត្ថកិច្ចមិនទាន់ សន្និដ្ឋានថា ជាករណីឃាតកម្មនៅឡើយ ខណៈសមត្ថកិច្ចកំពុងធ្វើការស៊ើបអង្កេតស្រាវជ្រាវបន្តទៀត ៕
ដោយ៖ សុថាន
