សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្នុងឱកាសអញ្ជើញជាអធិបតី បិទកិច្ចប្រជុំត្រួតពិនិត្យប្រចាំឆ្នាំ២០២៣ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ នៅព្រឹកថ្ងៃទី១៤ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ៖ ការកែទម្រង់តាមអភិក្រម «រៀនបណ្តើរ ធ្វើបណ្តើរ» គឺជាស្មារតី ដែលថ្នាក់ដឹកនាំយើងតែងតែប្រកាន់យកដើម្បីរក្សានូវស្ថិរភាព និងចីរភាពនៃការអភិវឌ្ឍ។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖ ការកែទម្រង់នៅកម្ពុជា ប្រើអភិក្រមនៃការបោះជំហ៊ានជាដំណាក់កាល គ្មានការសង្ស័យឡើយថា ការកែទម្រង់ការគ្រប់គ្រងហិរញ្ញវត្ថុសាធារណៈ ក៏ដូចជាការកែទម្រង់គន្លឹះផ្សេងទៀត គឺជាឆន្ទៈផ្ទាល់របស់រាជរដ្ឋាភិបាល នៅក្នុងទស្សនៈវិស័យវែងឆ្ងាយ នៃការអភិវឌ្ឍជាតិនិងមាតុភូមិឱ្យកាន់តែរីកចម្រើនរុងរឿងជឿនលឿន។
សម្តេចធិបតី ហ៊ុន ម៉ាណែត ក៏បានបញ្ជាក់បន្ថែមថា អភិក្រមនៅក្នុងការអនុវត្តជាក់ស្តែងនៃការកែទម្រង់គឺជាបញ្ហាដែលត្រូវយកចិត្តទុកដាក់ខ្ពស់ដើម្បីធានាថា ការកែទម្រង់អាចប្រព្រឹត្តទៅដោយរលូន ជាមួយនឹងការរក្សាបាននូវស្ថិរភាព ទាំងនៅក្នុងក្របខណ្ឌស្ថាប័នអនុវត្តន៍ ក៏ដូចជានៅក្នុងក្របខណ្ឌនៃសង្គមជាតិទាំងមូល និងដើម្បីធានាផងដែរថា ការកែទម្រង់នឹងចូលរួមចំណែកជាវិជ្ជមានជាជំហ៊ានៗ ដល់កិច្ចប្រឹងប្រែងជំរុញការអភិវឌ្ឍសង្គមសេដ្ឋកិច្ច។
ទន្ទឹមនេះដែរ សម្តេចធិបតី ហ៊ុន ម៉ាណែត បានសង្កត់ធ្ងន់ថា គុណតម្លៃដ៏សំខាន់មួយទៀតនៃអភិក្រមនេះ គឺការកែទម្រង់ដោយបោះជំហ៊ានជាដំណាក់កាល ដែលនឹងផ្តល់លទ្ធភាពឱ្យយើងអាចដោះស្រាយបញ្ហាចំពោះមុខដែលជាអាទិភាពបន្ទាន់ផង ទន្ទឹមនឹងការអាចចាប់ផ្តើមអនុវត្តន៍សាកល្បងនូវសមាសធាតុគន្លឹះនានាដែលចាំបាច់សម្រាប់ត្រៀមលក្ខណៈមុននឹងដល់ដំណាក់កាលបន្តបន្ទាប់។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ៖ កិច្ចការកែទម្រង់ដែលជោគជ័យ ត្រូវតែផ្អែកលើកត្តាសំខាន់៤ ៖
ទី១. ត្រូវមានចក្ខុវិស័យច្បាស់លាស់ ។
ទី២. ត្រូវមានការប្តេជ្ញាចិត្តខ្ពស់ ។
ទី៣. ត្រូវមានការចូលរួមដោយភាពស្មោះត្រង់ ។
និងទី៤. ត្រូវមានការលះបង់។
ការថ្លែងបែបនេះក្នុងឱកាសសម្តេចធិបតី ហ៊ុន ម៉ាណែត អញ្ជើញបិទកិច្ចប្រជុំត្រួតពិនិត្យប្រចាំឆ្នាំ២០២៣ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤ នាព្រឹកថ្ងៃទី១៤ ខែកុម្ភៈ ឆ្នាំ២០២៤ នៅសណ្ឋាគារសុខាភ្នំពេញ។
សម្ដេចធិបតីបានលើកឡើងពាក់ព័ន្ធទៅនឹងភាពចាំបាច់ក្នុងការបន្តជ្រោងឱ្យកាន់តែខ្ពស់នូវ «ស្មារតីកែទម្រង់»។ រយៈពេល២០ឆ្នាំកន្លងមកនេះ កម្ពុជាបានធ្វើដំណើរឆ្លងកំណាត់ផ្លូវដ៏វែងឆ្ងាយនៃការកែទម្រង់ការគ្រប់គ្រងហិរញ្ញវត្ថុសាធារណៈ ៕
ដោយ ៖ សិលា
