សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្នុងពិធីសម្ពោធដាក់ឱ្យប្រើប្រាស់ជាផ្លូវការ «អគារតេជោសែន» និង «បិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍» នៅរសៀលថ្ងៃទី២១ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ៖ គោលនយោបាយរបស់រាជរដ្ឋាភិបាល នៅអាណត្តិទី៧ ក៏ដូចជាអាណត្តិបន្តបន្ទាប់ គឺការពង្រឹងមូលដ្ឋានសម្រាប់ការអភិវឌ្ឍ ពីព្រោះជាចំណុចសំខាន់ដែលអាចធានាដល់ការអភិវឌ្ឍប្រកបដោយចីរភាព។
សម្តេចធិបតី ហ៊ុន ម៉ាណែត បានគូសបញ្ជាក់ថា ការពង្រឹងមូលដ្ឋានគ្រឹះសេដ្ឋកិច្ច គឺជារឿងចាំបាច់ដែលរាជរដ្ឋាភិបាលត្រូវយកចិត្តទុកដាក់ ដែលមូលដ្ឋានគ្រឹះនៃសេដ្ឋកិច្ចកម្ពុជា គឺពឹងផ្អែកទៅលើវិស័យឯកជន និងសេដ្ឋកិច្ចក្រៅប្រព័ន្ធ។
សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា យើងត្រូវខិតខំទាញសហគ្រាសធុនមីក្រូ តូច និងមធ្យម និងសេដ្ឋកិច្ចក្រៅប្រព័ន្ធ ឱ្យបានចូលក្នុងប្រព័ន្ធ ដើម្បីងាយស្រួលប្រទាក់ក្រឡាគ្នា ពោលគឺយើងត្រូវរួមគ្នាធ្វើការងារដើម្បីបង្កើតកម្លាំងសេដ្ឋកិច្ចសម្រាប់ជាតិរបស់យើង ។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអំពាវនាវដល់ក្រុមអ្នកសេដ្ឋកិច្ចក្រៅប្រព័ន្ធ ទាំងអស់ សូមទៅចុះបញ្ជីក្នុងក្រុមសេដ្ឋកិច្ចក្នុងប្រព័ន្ធ ដើម្បីឱ្យក្រុមអ្នកប្រកបរបរជំនួញផ្សេងៗ រួមផ្ដុំគ្នា កាន់តែរឹងមាំ។ សម្ដេចធិបតីបញ្ជាក់ឱ្យដឹងដែរថា ក្រុមសេដ្ឋកិច្ចក្រៅប្រព័ន្ធ ជាក្រុមអ្នកប្រកបរបរជំនួញ ផ្សេងៗដែលមិនទាន់បានចុះបញ្ជី។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ប្រកាសគាំទ្រចំពោះគំនិតផ្ដួចផ្ដើមបង្កើតឱ្យមាន ការចងសម្ព័ន្ធគ្នា នៃមន្ទីរពិសោធន៍ជាតិ។
សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ជំរុញឱ្យរួមគ្នាអភិរក្សដីស្រែអំបិល នៅខេត្តកែប និងខេត្តកំពត ៕
ដោយ ៖ សិលា
