សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវបានកម្លាំងសមត្ថកិច្ចធ្វេីការឃាត់ខ្លួនពាក់ព័ន្ធករណីលួចយករ៉ឺម៉កសណ្តោងមួយគ្រឿងបានសម្រេច។
ការឃាត់ខ្លួននេះបានធ្វេីឡេីងកាលពីវេលាម៉ោង១៦ និង០០នាទី ថ្ងៃទី២០ ខែកុម្ភៈឆ្នាំ២០២៤ នៅចំណុចផ្លូវបេតុង ភូមិកាកាប សង្កាត់កាកាបទី២ ខណ្ឌពោធិ៍សែនជ័យ។
ជនសង្ស័យឈ្មោះ កប សំអឿន ភេទប្រុស អាយុ៣៨ឆ្នាំ មុខរបររើសអេតចាយ ស្នាក់នៅបន្ទប់ជួលេខ៩ ភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ចំណែកជនរងគ្រោះឈ្មោះ សយ រដ្ឋា ភេទប្រុស អាយុ៣៣ឆ្នាំ មុខរបរទិញលក់អេតចាយ ស្នាក់នៅភូមិព្រៃសាលា សង្កាត់ កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
យោងតាមការបំភ្លឺពីជនរងគ្រោះឈ្មោះ សយ រដ្ឋា ភេទប្រុស អាយុ៣៣ឆ្នាំ បានឱ្យសមត្ថកិច្ចដឹងថា មុន ពេលកើតហេតុ ថ្ងៃទី១៨ ខែកុម្ភៈ ឆ្នាំ២០២៤ វេលាម៉ោងប្រហែល១៤ និង០០នាទីថ្ងៃត្រង់ រូបខ្លួនបានបើកម៉ូតូសណ្តោង រ៉ឺម៉កមួយគ្រឿងគ្មានផ្លាកលេខមកពីទិញអេតចាយក្នុងភូមិ យកមកទុកអែបគៀនផ្ទះស្ថិតនៅភូមិព្រៃសាលា សង្កាត់ កាកាបទី២ ខណ្ឌពោធិ៍សែនជ័យ រាជានីភ្នំពេញ កន្លែងកើតហេតុដូចសព្វដង បន្ទាប់ពីបានចាក់សោរទុកដាក់រួច រូបខ្លួន ក៏បានចូលទៅក្នុងផ្ទះដើម្បីរៀបចំអីវ៉ាន់។ រហូតដល់ម៉ោង១៤ និង៣០នាទី ថ្ងៃ-ខែ-ឆ្នាំដដែល ទើបរូបខ្លួនចេញពីក្នុងផ្ទះ មកវិញដើម្បីមកយករ៉ឺម៉កខាងលើដើរទិញអេតចាយបន្តទៀត ប៉ុន្តែពេលមកដល់កន្លែងទុករ៉ឺម៉កស្រាប់តែបាត់មិនឃើញរ៉ឺ ម៉ករបស់ខ្លួនក៏ផ្អើលឆោឡោឡើង រួចខ្លួនក៏បានសុំឆែកកាំមេរ៉ាសុវត្ថិភាពរបស់ផ្ទះអ្នកជិតខាងមើល ទើបដឹងថារ៉ឺម៉ក សណ្តោងរបស់ខ្លួនត្រូវបានជនសង្ស័យចំនួន០១នាក់លួចយកទៅបាត់ហើយ។
លុះមកដល់ថ្ងៃទី២០ ខែកុម្ភៈ ឆ្នាំ២០២៤ វេលាម៉ោង១៦ និង០០នាទី ពេលរូបខ្លួនកំពុងតែជិះម៉ូតូដើររករ៉ឺម៉ក របស់ខ្លួនវិញ ស្រាប់បានប្រទះឃើញរ៉ឺម៉ករបស់ខ្លួន នៅចំណុចផ្លូវបេតុង ភូមិកាកាប សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ដោយមានគេកំពុងតែបើកបរ ឃើញដូចនោះ រូបខ្លួនក៏បានជិះម៉ូតូទៅកាក់រ៉ឺម៉កខាងលើ ព្រមទាំងឃាត់ បានជនសង្ស័យចំនួន០១នាក់ដែលជាអ្នកបើកបរ រួចក៏នាំខ្លួនជនសង្ស័យ រួមទាំងវត្ថុតាងមកប្រគល់ ជូនសមត្ថកិច្ចប៉ុស្តិ៍នគរបាលរដ្ឋបាលកាកាបទី២ ដើម្បីសាកសួរ និងដាក់ពាក្យបណ្ដឹងចាត់ការតាមនីតិវិធីតែម្តង៕
ដោយ៖សុខាសែនជ័យ
