សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើប MCLAREN ពាក់ផ្លាកលេខកម្ពុជា GAN.2790 មួយគ្រឿងបានបេីកបរជ្រុលចង្កូតទៅបុករបាំងថ្មពុះចែកទ្រូងផ្លូវ បណ្តាលឱ្យបាក់ខ្ទាតចេញអស់ចំនួន០៣កង់ កាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១ ខែមីនា ឆ្នាំ២០២៤ ស្ថិតនៅចំណុចមុខផ្សារទំនើប អ៉ីអនម៉លទី១ វិថីសុធារស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថា៖ មុនពេលកើតហេតុ គេឃើញរថយន្តស៊េរីទំនើប១គ្រឿងម៉ាក MCLAREN ពណ៌បៃតងខ្ចី ពាក់ផ្លាកលេខ កម្ពុជា GAN.2790 បើកបរក្នុងល្បឿនលឿន តាមបណ្តោយវិថីសម្តេចសុធារសពីជើងទៅត្បូង លុះមកដល់ចំណុចកើតហេតុទល់មុខផ្សារទំនើបអ៉ីអនម៉ល ស្រាប់តែរេចង្កូតទៅឆ្វេង ជ្រុលទៅបុកក្បាលនាគពុះចែកទ្រូងផ្លូវពេញទំហឹង បណ្តាលឱ្យខូចខាតអស់ចំនួន៣កង់ ទើបរថយន្តបែកកង់រេចង្កូតទៅម្ខាងផ្លូវ មិនអាចបន្តដំណើរទៅមុខទៀតបាន។
ក្នុងករណីគ្រោះថ្នាក់ចរាចរណ៍នេះ មិនបានបង្កឱ្យនរណាម្នាក់រងរបួសនោះទេ ដោយខូចខាតតែរថយន្ត និងរបាំងថ្មតែប៉ុណ្ណោះ ។ ចំណែកម្ចាស់រថយន្តបង្ក បានគេចខ្លួនចេញពីកន្លែងកេីតហេតុបាត់ ដោយបន្សល់ទុករថយន្តនៅកន្លែងកេីតហេតុ ។
ក្រោយកើតហេតុ សមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែងនិងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តបង្កចូលខ្លួនមកដោះស្រាយតាមនីតិវិធី ៕
ដោយ ៖ ភារ៉ា ដង្កោ
