ហេតុអ្វីបានជាក្រុមឧទ្ទាម IS ប្រញាប់ប្រញាល់អះអាងទទួលខុសត្រូវចំពោះការវាយប្រហារភេរវកម្មនៅទីក្រុងមូស្គូ?

មកទល់ពេលនេះមានចម្ងល់ជាច្រើនបានកើតឡើងក្រោយការវាយប្រហារភេរវកម្មនៅក្នុងប្រទេសរុស្ស៊ី ហើយអាមេរិកបានប្រកាសថា ក្រុមភេរវកម្ម IS នៅពីក្រោយការវាយប្រហារនោះ។ ទាំងនោះហើយបានបង្កឱ្យមានចម្ងល់ជាច្រើនថា តើជាសកម្មភាព របស់ក្រុមភេរវកម្មឬក៏ប្រទេសលោកខាងលិច ក្នុងគោលដៅញុះញង់ពលរដ្ឋឱ្យប្រឆាំងជាមួយមេដឹកនាំពូទីន ដែលទើបតែជាប់ឆ្នោត។ តើនេះជាយុទ្ធសាស្ត្រ បដិវត្តន៍និទាឃរដូវដែលអាមេរិក បានធ្វើទៅលើប្រទេសជាច្រើននាពេលកន្លងមកសម្រាប់ប្រទេសប្រឆាំងអាមេរិក។
ក្រុមឧទ្ទាម ISIS-K បានអះអាងទទួលខុសត្រូវចំពោះការវាយប្រហារភេរវកម្មលើមជ្ឈមណ្ឌលលក់ទំនិញ Crocus ប៉ុន្តែភ្នាក់ងារសន្តិសុខរុស្ស៊ីមិនទាន់បានបញ្ជាក់នៅឡើយទេ។
សារព័ត៌មាន រ៉យទ័របានដកស្រង់សម្តីមន្ត្រីអាមេរិកដែលមិនបញ្ចេញឈ្មោះបាននិយាយថា ទីក្រុងវ៉ាស៊ីនតោនមានព័ត៌មានថា ក្រុមឧទ្ទាម IS ជាអ្នកនៅពីក្រោយការវាយប្រហារភេរវកម្មលើមជ្ឈមណ្ឌលលក់ទំនិញ Crocus នៅជាយក្រុងមូស្គូកាលពីល្ងាចថ្ងៃទី ២២ ខែមីនា។
ប្រភពនេះបានបន្ថែមថា ក្រុមរដ្ឋអ៊ិស្លាមដែលប្រកាសខ្លួនឯងឈ្មោះ Khorasan (ISIS-K) នៅអាហ្វហ្គានីស្ថាន គឺជាពិរុទ្ធជននៅពីក្រោយការវាយប្រហារ ហើយពួកគេត្រូវបានគេស្គាល់ថា សម្រាប់ការវាយប្រហារភេរវកម្មដ៏ឃោរឃៅនៅក្នុងប្រទេសជាច្រើននៅអាស៊ីកណ្តាល ដូចជាអុីរ៉ង់ តូមែននីស្ថាន និងអាហ្វហ្គានីស្ថាន។
ចាប់តាំងពីឆ្នាំ 2014 មក ISIS-K ប្រតិបត្តិការភាគច្រើននៅភាគខាងកើតអាហ្វហ្គានីស្ថាន។ ISIS-K រីកចម្រើនក្នុងអំឡុងពេលដែលក្រុមឧទ្ទាម IS ពង្រីកអំណាចនៅទូទាំងមជ្ឈិមបូព៌ា។ ទោះបីជាចំនួនសមាជិក ISIS-K បានថយចុះគួរឱ្យកត់សម្គាល់ចាប់តាំងពីឆ្នាំ 2018 ដោយសារតែការវាយឆ្មក់ជាបន្តបន្ទាប់ដោយសហរដ្ឋអាមេរិក និងពួកតាលីបង់ក៏ដោយ នេះនៅតែជាសាខារបស់ក្រុម IS សកម្មបំផុតនៅក្នុងតំបន់។

ហេតុអ្វី ISIS-K វាយប្រហាររុស្ស៊ី?
ការវាយប្រហារលើមជ្ឈមណ្ឌលលក់ទំនិញ Crocus ក្នុងទីក្រុងមូស្គូ គឺជាសកម្មភាពដែលមិនធ្លាប់មានពីមុនមកដោយ ISIS-K ជាពិសេសក្រុមឧទ្ទាម IS ជាទូទៅ។ សូម្បីតែពេលដែលអង្គការភេរវជននេះមានកម្លាំងខ្លាំងបំផុតក៏ដោយ។
យោងតាមអ្នកជំនាញមួយចំនួន ការវាយប្រហារនៅទីក្រុង Crocus បង្ហាញពីការប្រឆាំងរបស់ ISIS-K ចំពោះគោលនយោបាយរបស់វិមានក្រឹមឡាំងក្នុងប៉ុន្មានឆ្នាំថ្មីៗនេះ។ នេះរួមបញ្ចូលយុទ្ធនាការប្រឆាំងភេរវកម្មរបស់ក្រុងមូស្គូនៅស៊ីរី។
លោក Colin Clarke – អ្នកជំនាញផ្នែកសន្តិសុខនៅមជ្ឈមណ្ឌល Soufan Group ដែលជាអង្គការវិភាគសន្តិសុខមិនស្វែងរកប្រាក់ចំណេញដែលមានមូលដ្ឋាននៅសហរដ្ឋអាមេរិកបាននិយាយថា ISIS-K ចង់ពង្រីកតំបន់ឥទ្ធិពលរបស់ពួកគេនៅក្នុងប្រទេសរុស្ស៊ីអស់រយៈពេលពីរឆ្នាំមកហើយ។ សេចក្តីថ្លែងការណ៍រិះគន់វិមានក្រឹមឡាំងនៅក្នុងសកម្មភាពឃោសនារបស់ក្រុមនេះ។
យោងតាមលោក Michael Kugelman នៃមជ្ឈមណ្ឌល Wilson ដែលមានមូលដ្ឋាននៅទីក្រុងវ៉ាស៊ីនតោន ISIS-K “មើលឃើញថាប្រទេសរុស្ស៊ីមានភាពស្មុគស្មាញក្នុងការគាបសង្កត់ប្រជាជនម៉ូស្លីម” ។ លោកបានបន្ថែមថា ISIS-K គឺគ្រាន់តែជាអង្គការភេរវកម្មមួយក្នុងចំណោមអង្គការភេរវករជាច្រើននៅអាស៊ីកណ្តាលដែលមាននិន្នាការប្រឆាំងនឹងរុស្ស៊ី។
ចំណាត់ការរបស់ IS ដើម្បីទទួលស្គាល់តួនាទីរបស់ខ្លួនភ្លាមៗក្នុងការវាយប្រហារភេរវកម្មនៅទីក្រុងមូស្គូ ត្រូវបានអ្នកជំនាញជាច្រើនចាត់ទុកថាជារឿងគួរឱ្យភ្ញាក់ផ្អើល បន្ថែមពីលើការពិតដែលអាមេរិកបញ្ជាក់ថាគ្មានហេតុផលអ្វីដែលត្រូវសង្ស័យចំពោះសេចក្តីថ្លែងការណ៍របស់អង្គការនេះទេ។
ការវិភាគអំពីហេតុផលនៃការវាយប្រហារនេះ មិនអាចពន្យល់បានទាំងស្រុងពីហេតុផលនៃអំពើភេរវកម្មនៅមជ្ឈិមបូព៌ាក្នុងប្រទេសរុស្ស៊ីនោះទេ នៅពេលដែលថ្មីៗនេះ ការផ្លាស់ប្តូររបស់ IS នៅក្នុងតំបន់គឺពាក់ព័ន្ធជាចម្បងទៅនឹងសកម្មភាពយោធាអាមេរិក និងលោកខាងលិច។
ការវាយប្រហារថ្មីៗរបស់ ISIS-K
យោងតាមប្រភពពីរ៉យទ័រ ធនធានរបស់ ISIS-K បានធ្លាក់ចុះយ៉ាងខ្លាំងចាប់តាំងពីសហរដ្ឋអាមេរិកបានដកកងទ័ពចេញពីអាហ្វហ្គានីស្ថានក្នុងឆ្នាំ 2021។ ទោះបីជាយ៉ាងណាក៏ដោយ ក្រុមនេះនៅតែធ្វើការវាយប្រហារភេរវកម្មនៅក្នុង និងក្រៅអាហ្វហ្គានីស្ថាននាពេលថ្មីៗនេះ។
នៅក្នុងខែកញ្ញា ឆ្នាំ 2022 ក្រុមឧទ្ទាម ISIS-K បានអះអាងទទួលខុសត្រូវចំពោះការបំផ្ទុះគ្រាប់បែកអត្តឃាតនៅស្ថានទូតរុស្ស៊ីក្នុងទីក្រុងកាប៊ុល។
ក្រុមនេះទទួលខុសត្រូវចំពោះការវាយប្រហារលើអាកាសយានដ្ឋានអន្តរជាតិក្រុងកាប៊ុលក្នុងឆ្នាំ 2021 ដែលបានសម្លាប់ទាហានអាមេរិក 13 នាក់ និងជនស៊ីវិលជាច្រើននាក់ អំឡុងពេលការជម្លៀសទាហានអាមេរិកដ៏វឹកវរចេញពីប្រទេសអាហ្វហ្គានីស្ថាន៕ ដោយ៖ ធីរីណា

រូបថត៖ Sputnik