ព័ត៌មានទាន់ហេតុការណ៍៖

មន្ត្រីចារកម្មជាន់ខ្ពស់រុស្ស៊ី ធ្វើទស្សនកិច្ចនៅកូរ៉េខាងជើង

ចែករំលែក៖

សារព័ត៌មាន AFP បានដកស្រង់ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃព្រហស្បតិ៍ ទី២៨ ខែមីនា ដែលបានរាយការណ៍ថា ប្រមុខចារកម្មរុស្ស៉ីបានធ្វើទស្សនកិច្ចនៅទីក្រុងព្យុងយ៉ាង កាលពីដើមសប្ដាហ៍កន្លងទៅនេះ ដើម្បីពិភាក្សាពីកិច្ចសហប្រតិបត្តិការសន្តិសុខ ខណៈដែលប្រទេសទាំង២កំពុងពង្រឹងទំនាក់ទំនងឱ្យកាន់តែស៊ីជម្រៅក្នុងបរិបទនៃសង្រ្គាមនៅអ៊ុយក្រែន។
លោក Sergei Naryshkin ជាប្រមុខសេវាស៊ើបការណ៍សម្ងាត់ក្រៅប្រទេសរបស់រុស្ស៉ី បានជួបរដ្ឋមន្ត្រីសន្តិសុខរដ្ឋកូរ៉េខាងជើង លោក Ri Chang Dae អំឡុងដំណើរទស្សនកិច្ចក្នុងទីក្រុងព្យុងយ៉ាងកាលពីថ្ងៃទី២៥ដល់ថ្ងៃទី២៧ ខែមីនា។ KCNA បានឱ្យដឹងថា មន្ត្រីជាន់ខ្ពស់ទាំង២បានពិភាក្សាពីការជំរុញកិច្ចសហប្រតិបត្តិការដើម្បីទប់ទល់នឹងការកើនឡើងការធ្វើចារកម្មនិងផែនការទុច្ចរិតរបស់កងកម្លាំងសត្រូវ។
គួរបញ្ជាក់ថា ទាំងរុស្ស៉ីនិងកូរ៉េខាងជើង សុទ្ធតែកំពុងស្ថិតនៅក្រោមការដាក់ទណ្ឌកម្មពីសំណាក់លោកខាងលិចដឹកនាំដោយសហរដ្ឋអាមេរិក ដោយក្នុងនោះមូស្គូ ជាប់ទណ្ឌកម្មដោយសារសង្រ្គាមប្រឆាំងអ៊ុយក្រែន រីឯកូរ៉េខាងជើងដោយសារតែការធ្វើតេស្តអាវុធនុយក្លេអ៊ែរ។ កាលពីខែកញ្ញា ឆ្នាំ២០២៣ ប្រធានាធិបតី
រុស្ស៉ី លោក វ្ល៉ាឌីមៀរ ពូទីន និងមេដឹកនាំកូរ៉េខាងជើង លោក គីម ជុងអ៊ុន បានជួបគ្នាក្នុងកិច្ចប្រជុំកំពូលមួយនៅតំបន់ចុងបូព៌ានៃប្រទេសរុស្ស៉ី ជាទីដែលលោក គីម បានប្រកាសថា ទំនាក់ទំនងជាមួយទីក្រុងមូស្គូ គឺជាអាទិភាពទីមួយសម្រាប់ប្រទេសរបស់លោក។
ភ្លាមៗនោះដែរ សហរដ្ឋអាមេរិកបានចោទប្រកាន់ថា កូរ៉េខាងជើងបានផ្គត់ផ្គង់អាវុធឱ្យរុស្ស៉ី សម្រាប់ប្រើប្រាស់នៅសមរភូមិអ៊ុយក្រែន ហើយកាលពីដើមខែមីនានេះ កូរ៉េខាងត្បូងក៏បានអះអាងដែរថា ទីក្រុងព្យុងយ៉ាងបានបញ្ជូនអាវុធ ៧០០០កុងតឺន័រ ទៅកាន់រុស្ស៉ី ចាប់តាំងពីការចាប់ផ្ដើមផ្ទេរអាវុធកាលពីខែកក្កដាឆ្នាំមុនមក។ ប៉ុន្តែ ទាំងរុស្ស៉ីនិងកូរ៉េខាងជើងបានច្រានចោលការចោទប្រកាន់ទាំងនេះ៕

ដោយ៖ ធីរីណា(រូប​ថត​៖ Reuters)


ចែករំលែក៖