សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ មនុស្ស៣នាក់រងរបួសធ្ងន់ ស្រាលក្នុងករណីម៉ូតូបុកជាមួយម៉ូតូកង់បីកាលពីវេលាម៉ោង ១៨ និង៥២នាទីព្រលប់ថ្ងៃទី២៧ ខែមីនា ឆ្នាំ២០២៤ តាមបណ្ដោយផ្លូវជាតិលេខ៥៩ចន្លោះគីឡូម៉ែត ៤០ និង៤១ ស្ថិតនៅភូមិកណ្តាល ឃុំម៉ាឡៃ ស្រុកម៉ាឡៃ ។
សមត្ថកិច្ចប្រាប់ថា មុនដំបូងមានម៉ូតូពីរគ្រឿងបើកបរបញ្រ្ចាសទិសគ្នាពីត្បូងទៅជើងលើផ្លូវជាតិលេខ៥៩ចន្លោះគីឡូម៉ែត្រ ៤០ និង៤១ ក្នុងនោះមានម៉ូតូ១គ្រឿង ម៉ាកHONDA DREAM ពណ៌ខ្មៅផ្លាកលេខ បាត់ដំបង 1X-2452 បើកបរដោយឈ្មោះ វ៉ែន រៃ ភេទ ប្រុស អាយុ ៣៦ឆ្នាំ រស់នៅភូមិអូរម្ញុង ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង បើកបរពីជើងទៅត្បូងដឹកម៉ាសុីនអារឈើមួយគ្រឿង មានសាំងមួយកាដុងប្រាំលីត្រ ចំណែកម៉ូតូមួយ គ្រឿងទៀត(ប្រភេទកែច្នៃកង់បី)បើកបរដោយ ឈ្មោះ សៀន ចាន់នឿន ភេទ ស្រី អាយុ៥៣ឆ្នាំ និងអ្នករួមដំណើរត្រូវជាកូន ឈ្មោះ សៀន ស្រី ភេទស្រី អាយុ ១៤ ឆ្នាំ រស់នៅភូមិកណ្តាល ឃុំម៉ាឡៃ ស្រុកម៉ាឡៃ បើកបរពីជើងទៅត្បូងទៅជើង លុះមកដល់ចំណុចកើតហេតុស្រាប់តែ បុកគ្នាបណ្ដាលឲ្យ កំពប់សាំងឆាបឆេះធ្វើអោយគ្រោះថ្នាក់តែម្ដង។
សមត្ថកិច្ចបន្តថា នៅក្នុងហេតុការណ៍នោះមនុស្សចំនួន៣នាក់រងរបួសធ្ងន់ស្រាលមាន ៖
១.ឈ្មោះ សៀន ចាន់នឿន អ្នកបើកបរម៉ូតូកង់បី របួស បាក់ដៃ ខាងស្តាំ ,២,អ្នករួមដំណើរឈ្មោះ សៀន ស្រី ឆេះភ្លើង រលាក់ស្បែកពេញខ្លួន(របួស) ។
៣.ឈ្មោះ វ៉ែន រៃ អ្នកបើកបរម្ខាងទៀត របួស ឆេះភ្លើង ដៃ ខ្លួន និងរលាកជើង(របួសមធ្យម)។
ក្រោយពេលកើតហេតុជនរងគ្រោះទាំង០៣នាក់បញ្ជូនទៅមន្ទីរពេទ្យមង្គលបូរី ០១ នាក់ ទៅសៀមរាប ០២នាក់។ដោយឡែក ម៉ូតូទាំងពីរគ្រឿងខូចខាត ទាំងស្រុងយកមករក្សាទុកនៅអធិការដ្ឋាន រងចាំដោះស្រាយតាមនីតិវិធី ៕
ដោយ៖ វណ្ណា
