សារព័ត៌មាន នគរវត្ត តែងតែនាំមុខគេជានិច្ច
ប្រធានរៀបចំព្រឹត្តិការណ៍អូឡាំពិកទីក្រុងប៉ារីសឆ្នាំ២០២៤ លោក Tony Estanguet បាននិយាយថា ព្រឹត្តិការណ៍នេះនឹងការពារដោយបន្ថែមប្រតិបត្តិការសន្តិសុខដែលមិនធ្លាប់មានពីមុនមក ហើយថា ការត្រៀមរៀបចំគឺស្ថិតក្នុងស្ថានភាពល្អ។
ក្នុងរយៈពេល១០០ថ្ងៃរហូតដល់ការចាប់ផ្តើមនៃព្រឹត្តិការណ៍កីឡាអូឡាំពិក លោកអះអាងថា “អ្នករៀបចំនឹង រក្សាភាពរាបទាបខ្លះៗ ពីព្រោះយើងដឹងថានៅក្នុងព្រឹត្តិការណ៍បែបនេះ អ្វីៗអាចកើតឡើងនៅដំណាក់កាលចុងក្រោយ។ខ្ញុំពេញចិត្តនឹងកន្លែងដែលយើងឈរនៅពេលនេះ សាររបស់ខ្ញុំគឺអ្នកអាចមានទំនុកចិត្តជាមួយព្រឹត្តិការណ៍នេះ”។
លោកបន្ថែមថា “ចំពេលមានការព្រួយបារម្ភកាន់តែខ្លាំងឡើងអំពីសុវត្ថិភាព ខ្ញុំចង់ធានាឡើងវិញថាវាមិនអាចចរចាបានទេ សន្តិសុខគឺជាអាទិភាព។ វាជាព្រឹត្តិការណ៍ធំបំផុតដែលបារាំងមិនធ្លាប់រៀបចំ ហើយយើងចង់បង្ហាញពីប្រទេសបារាំងដែលល្អបំផុត។ ដូច្នេះប្រាកដណាស់យើងប្ដេជ្ញាថានឹងត្រៀមខ្លួនជាស្រេច។ យើងទន្ទឹងរង់ចាំស្វាគមន៍ពិភពលោកនៅទីក្រុងប៉ារីស”។
“នៅពេលខ្ញុំពិភាក្សារឿងនេះជាមួយប្រធានរៀបចំព្រឹត្តិការណ៍នាទីក្រុងឡុងឆ្នាំ២០១២ គាត់បានប្រាប់ខ្ញុំថាឮ ក្នុងរយៈពេល១០០ថ្ងៃចុងក្រោយនេះ នឹងមានអ្នករិះគន់កាន់តែច្រើន មនុស្សជាច្រើនព្រួយបារម្ភ។ វាជាអ្វីដែលកំពុងកើតឡើង។ តួនាទីរបស់ខ្ញុំគឺរក្សាភាពស្ងប់ស្ងាត់ បន្តផ្តោតលើ អ្វីដែលសំខាន់ណាស់ក្នុងការចែកចាយ។ កន្លែងរៀបចំរួចរាល់ ថវិកាមានតុល្យភាព។ យើងមានការលក់សំបុត្រល្អណាស់ កម្រិតមហិច្ឆតាខ្ពស់ណាស់”។
ពិធីបើកគ្រោងនឹងធ្វើឡើងជាលើកដំបូងនៅខាងក្រៅកីឡដ្ឋានមួយ ដោយមានអត្តពលិកជាង១០,០០០នាក់រំពឹងថានឹងជិះទូកតាមបណ្ដោយ៦គីឡូម៉ែត្រនៃតំបន់Seineដែលមាន១៦០ទូក។ ទោះបីជាយ៉ាងណាក៏ដោយ នៅក្នុងសប្តាហ៍នេះ ប្រធានាធិបតីបារាំងលោក Emmanuel Macron បាននិយាយថា វាអាចត្រូវបានផ្លាស់ប្តូរទីតាំងទៅកាន់ទីលាន Trocadero ឬ Stade de France ប្រសិនបើហានិភ័យសន្តិសុខត្រូវបានគេចាត់ទុកថាខ្ពស់ពេក។ មានការព្រួយបារម្ភថា សង្គ្រាមនៅអ៊ុយក្រែន និងតំបន់ហ្កាហ្សាអាចបង្កើនការគំរាមកំហែង។
លោក Estanguet ប្រធានគណៈកម្មាធិការរៀបចំបាននិយាយថា “ខ្ញុំជឿជាក់លើប្រព័ន្ធនេះដើម្បីធានាដល់ពិធីបើកនេះ។ វាជាលើកដំបូងដែលមិនធ្លាប់មាន គោលបំណងគឺដើម្បីឱ្យមានមនុស្សច្រើនបំផុតរីករាយនឹងពេលវេលានេះ។ វាច្រើនជាងអ្វីដែលបានកើតឡើងនៅក្នុងកីឡដ្ឋានពីមុន៥ដង ដូច្នេះវាជាឱកាសដ៏ល្អ”។
ដើមឡើយអ្នករៀបចំគ្រោងនឹងផ្ទុកមនុស្សប្រមាណ៦០ម៉ឺននាក់ ដើម្បីទស្សនាពិធីពីមាត់ទន្លេ ប៉ុន្តែឥឡូវនេះត្រូវបានកាត់បន្ថយមកត្រឹម៣០០,០០០នាក់។ ភ្ញៀវទេសចរណ៍នឹងមិនត្រូវបានផ្តល់ឱ្យដោយឥតគិតថ្លៃដើម្បីទស្សនាពិធីដូចដែលបានគ្រោងទុកដំបូងឡើយ។ ផ្ទុយទៅវិញសំបុត្រនឹងធ្វើឡើងដោយការអញ្ជើញតែប៉ុណ្ណោះ មិនមែនតាមរយៈការចុះឈ្មោះបើកចំហនោះទេ។
ប្រទេសបារាំងបានបង្កើនកម្រិតការគំរាមកំហែងផ្នែកសន្តិសុខរបស់ខ្លួនក្នុងខែតុលា នៅពេលដែលគ្រូបង្រៀនម្នាក់ត្រូវបានសម្លាប់ក្នុងការវាយប្រហារដោយកាំបិតក្នុងសាលាក្នុងក្រុង Arras។ កាលពីខែធ្នូ បុរសជនជាតិអាឡឺម៉ង់ម្នាក់បានស្លាប់ និងពីរនាក់ផ្សេងទៀតបានរងរបួសក្នុងការវាយប្រហារដោយកាំបិត និងញញួរនៅតាមផ្លូវមួយនៅកណ្តាលទីក្រុងប៉ារីស។
មន្ត្រីសន្តិសុខអ៊ឺរ៉ុបបានព្រមានពីហានិភ័យកើនឡើងនៃការវាយប្រហារដោយពួកសកម្មប្រយុទ្ធចំពេលមានសង្គ្រាមអ៊ីស្រាអែល-ហ្គាហ្សា។ ក្តីបារម្ភក៏ត្រូវបានកើនឡើងផងដែរ បន្ទាប់ពីការគំរាមកំហែងពីក្រុមរដ្ឋអ៊ីស្លាម (IS) ចំពោះការប្រកួតបាល់ទាត់វគ្គ១/៤ផ្តាច់ព្រ័ត្រ Champions League រួមទាំងនៅទីក្រុងប៉ារីសផងដែរ។
កាលពីសប្តាហ៍មុន ការបង្ហោះមួយត្រូវបានចែករំលែកដោយ Al-Azaim Foundation ដែលជាបណ្តាញផ្សព្វផ្សាយដែលទទួលខុសត្រូវចំពោះការផ្សព្វផ្សាយសារពីសាខា IS-K នៃក្រុមសកម្មប្រយុទ្ធអ៊ីស្លាម។ ក្រុម IS-K ក៏បានអះអាងទទួលខុសត្រូវចំពោះការវាយប្រហារដ៏សាហាវលើសាលាក្រុង Crocus ក្នុងក្រុងម៉ូស្គូកាលពីខែមុន ៕
ដោយ៖ ភារៈ(រូបភាព ៖ BBC Sport)
