សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះម៉ូតូក្នុងល្បឿនលឿនវ៉ាជែងរេចង្កូតទៅបុករថយន្តមួយគ្រឿងនិងបន្តទៅបុកម៉ូតូ១គ្រឿងទៀតបណ្តាលឱ្យរងការខូចខាតទាំង៣គ្រឿងយ៉ាងដំណំ តែសំណាងល្អមិនបណ្តាលឱ្យមនុស្សណាម្នាក់រងរបួសនោះឡើយ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១ និង៤៥នាទីរសៀលថ្ងៃទី២៣ខែមេសាឆ្នាំ២០២៤ស្ថិតនៅតាមបណ្តោយផ្លូវបេតុង ក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
បើតាមប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូម៉ាកហុងដាស្គូពីពណ៌សលាយក្រហមពាក់ស្លាកលេខភ្នំពេញ1KI-5317ធ្វើដំណើរតាមបណ្តោយផ្លូវបេតុងក្នុងទិសដៅពីជើងទៅត្បូង ខណៈពេលមកដល់ចំណុចកើតហេតុខាងលើបានបើកវ៉ាជែងរថយន្ត១គ្រឿងមិនចាំម៉ាកដែលកំពុងធ្វើដំណើរស្របទិសដៅគ្នា ហើយក៏បានរេចង្កូតទៅបុករថយន្តម៉ាកតូយ៉ូតាព្រូសពណ៌ស ពាក់ស្លាកលេខភ្នំពេញ2BV-7543ដដែលកំពុងធ្វើដំណើរតាមបណ្តោយផ្លូវបេតុងបញ្ច្រាសទិសដៅគ្នា ហើយម៉ូតូបង្កនៅមានល្បឿនក៏ជ្រុលទៅបុកម៉ូតូ១គ្រឿងទៀតដែលកំពុងធ្វើដំណើរខាងក្រោយស្របទិសដៅជាមួយរថយន្តម៉ាកតូយ៉ូតាព្រូសបណ្តាលឱ្យរងការខូចខាតរថយន្តនិងម៉ូតូទាំង៣គ្រឿងយ៉ាងដំណំ តែសំណាងល្អមិនបណ្តាលឱ្យមនុស្សណាម្នាក់រងរបួសនោះឡើយ។
ក្រោយកើតហេតុសមត្ថកិច្ចជំនាញមូលដ្ឋានបានចុះទៅដល់កន្លែងកើតហេតុធ្វើការវាស់វែង រួចហើយអោយភាគីម្ចាស់រថយន្តនិងម្ចាស់ម៉ូតូទាំង២គ្រឿងធ្វើការសម្រួលគ្នាដោយភាគីម្ចាស់ម៉ូតូហុងដាស្គូពីបង្កសងថ្លៃជួសជុលទៅអោយម្ចាស់រថយន្តនិងម៉ូតូដើម្បីបញ្ចប់រឿងនៅកន្លែងកើតហេតុ៕
ដោយ៖សុខាសែនជ័យ
