សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ យោងតាមរបាយការណ៍ពីសមត្ថកិច្ចបានបញ្ជាក់ថា នៅព្រឹកថ្ងៃទី១៣ខែឧសភា ឆ្នាំ២០២៤នេះថាមានភ្លៀងធ្លាក់មួយមេលាយឡំជាមួយខ្យល់កន្ត្រាក់និងផ្គររន្ទះ បានបណ្តាលអោយឃុំចំនួន០២ របស់ស្រុកបវេល រងផលប៉ះពាល់បណ្តាលអោយមនុស្សម្នាក់ស្លាប់ និងផ្ទះពលរដ្ឋ០៤ខ្នងរងការខូចខាតកាលពីវេលាម៉ោង១៦និង៣០នាទី ថ្ងៃទី១២ ខែឧសភា ឆ្នាំ២០២៤។
របាយការណ៍ដដែលបានបញ្ជាក់ទៀតថា ឃុំចំនួន០២ដែលរងគ្រោះដោយខ្យល់កន្ត្រាក់ផ្គររន្ទះ ក្នុងនោះមានឃុំល្វា បណ្តាលអោយរន្ទះបាញ់ស្លាប់មនុស្សម្នាក់ឈ្មោះ ផា ណារ៉ាំង ភេទប្រុស អាយុ៤៨ឆ្នាំ រស់នៅភូមិតានី ឃុំល្វា ស្រុកបវេល ខេត្តបាត់ដំបង និងឃុំក្តុលតាហែន បណ្តាលអោយខូចខាតរបើកដំបូលផ្ទះប្រជាពលរដ្ឋសរុបចំនួន០៤ខ្នង ។
ក្នុងនោះអាជ្ញាធរនិងសមត្ថកិច្ចខេត្តបាត់ដំបងសូមសំណូមពរដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នចំពោះគ្រោះធម្មជាតិខ្យល់កន្ត្រាក់ផ្គររន្ទះ ខណៈរដូវវស្សាចូលមកដល់៕
ដោយ៖ ចន្ទ លីហ្សា
