សារព័ត៌មាន នគរវត្ត តែងតែនាំមុខគេជានិច្ច
ក្រុងបូកគោ៖ ពេញមួយព្រឹកថ្ងៃទី២៩ ខែឧសភា ឆ្នាំ២០២៤ ដែលជាថ្ងៃទី២ ក្នុងដំណើរបេសកកម្មព័ត៌មានដើម្បីផ្សព្វផ្សាយទ្រង់ទ្រាយធំពីសក្តានុពលនៃការអភិវឌ្ឍន៍ទីក្រុងបូកគោ បានបន្តចុះទស្សនៈកិច្ចទីតាំងទេសចរប្រវត្តិសាស្ត្រ សំណង់ទំនប់ទឹកថ្មី និងគំរោងសាងសង់សំណង់បុរីដែលកំពុងអភិវឌ្ឍន៍នៅលើភ្នំបូកគោ ។
ទីតាំងដែលក្រុមអ្នកសារព័ត៌មានចំនួន៣០ស្ថាប័នចុះទស្សនៈកិច្ចនៅថ្ងៃទី២នេះដែរ រួមមាន ទី១-វិមានអ្នកតាភ្នំជាទីកន្លែងស័ក្តិសិទ្ធសម្រាប់គោរពបូជារបស់ភ្ញៀវទេសចរដែលមានជំនឿខាងសាសនា ,ទី២-វត្តសំពៅ៥ ជាទីសក្ការៈគោរពបូជាតាមជំនឿសាសនានិងជាកន្លែងទេសចរណ៍ប្រវត្តិសាស្ត្រ ហើយវត្តសំពៅ៥នេះជាវត្តដែលមានអាយុកាលរាប់រយឆ្នាំនៅលើកំពូលភ្នំបូកគោ , ទី៣-ទំនប់ទឹកថ្មីដែលកំពុងតែសាងសង់តភ្ជាប់ពីភ្នំមួយទៅភ្នំមួយទៀតមានបណ្តោយ២០០ម៉ែត្រកម្ពស់២២ម៉ែត្រដើម្បីរក្សាទឹកទុកសម្រាប់ផ្គត់ផ្គង់ទឹកនៅក្នុងទីក្រុងបូកគោកុំអោយមានការខ្វះខាត , ទី៤-ចុះទស្សនៈកិច្ចគម្រោងកំពុងធ្វើការអភិវឌ្ឍន៍ហេដ្ឋារចនាសម្ព័ន្ធផ្លូវ គម្រោងសាងសង់បុរីមាន៣ជាប្រភេទសំណង់ផ្ទះវីឡាទំនើបទាន់សម័យ ផ្ទះលំហែកាយ ផ្ទះល្វែង ។ បុរីទាំង៣មានឈ្មោះ បុរីមរកតឋានសួគ៌ ,បុរីអម្រិតឋានសួគ៌ និង បុរីក្រោនឋានសួគ៌ ។
សូមបញ្ជាក់ថា នេះជាថ្ងៃទី២ នៃដំណើរបេសកកម្មព័ត៌មានដើម្បីផ្សព្វផ្សាយទ្រង់ទ្រាយធំពីសក្តានុពលនៃការអភិវឌ្ឍន៍ទីក្រុងបូកគោ រៀបចំដោយក្លឹបអ្នកកាសែតកម្ពុជាដឹកនាំដោយលោកពុយ គា ប្រធានក្លឹបអ្នកាសែតកម្ពុជានិងមានការរៀបចំទទួលស្នាក់នៅ អាហារប្រចាំថ្ងៃដោយក្រុមហ៊ុនសុខា អូតែល ៕
ដោយ៖ សណ្តោស
