កម្តៅកើនឡើងជិតដល់៥០អង្សាសេ ហើយនៅក្នុងប្រទេសឥណ្ឌា

ចែករំលែក៖

សារព័ត៌មាន AFP នៅថ្ងៃពុធ ទី២៩ ខែឧសភា ឆ្នាំ ២០២៤ បានផ្សាយថា សីតុណ្ហភាពនៅក្នុងរដ្ឋធានីញូវដេលី បានឡើងដល់កម្រិតខ្ពស់បំផុតគឺ ៤៩.៩អង្សាសេ ខណៈដែលអាជ្ញាធរព្រមានអំពីការខ្វះខាតទឹកនៅក្នុងទីក្រុងដ៏ធំរបស់ប្រទេសឥណ្ឌាមួយនេះ។
នាយកដ្ឋានឧតុនិយមឥណ្ឌា (IMD) ដែលរាយការណ៍ពី «លក្ខខណ្ឌនៃរលកកម្តៅធ្ងន់ធ្ងរ» បានកត់ត្រាកម្រិតសីតុណ្ហភាពដូចខាងលើ កាលពីថ្ងៃអង្គារសប្តាហ៍នេះ នៅតំបន់ជាយក្រុងញូវដេលី Delhi ចំនួនពីរគឺ Narela និង Mungeshpur ខណៈសីតុណ្ហភាពមានកម្រិតខ្ពស់ជាងការព្យាករដល់ទៅ ៩អង្សាសេ។ នៅថ្ងៃពុធនេះ ក្រុមអ្នកឧតុនិយមបានព្យាករពីសីតុណ្ហភាពស្រដៀងគ្នានេះ សម្រាប់ទីក្រុងដែលមានប្រជាជនប្រមាណជាង៣០លាននាក់ និងបានចេញសេចក្តីជូនដំណឹងអំពីការព្រមានពណ៌ក្រហម សម្រាប់ប្រជាជនឱ្យយកចិត្តទុកដាក់ថែទាំសុខភាព។ កម្រិតពណ៌ក្រហមគឺជាការព្រមានពី «លទ្ធភាពខ្ពស់នៃការវិវត្តទៅជាជំងឺគ្រុនក្តៅ និងជំងឺសន្លប់ដោយសារកម្តៅ ចំពោះមនុស្សគ្រប់វ័យ» ជាមួយនិង «ការថែទាំជាចាំបាច់បំផុតសម្រាប់អ្នកដែលងាយរងគ្រោះ»។ កម្តៅក៏នឹងឡើងខ្ពស់នៅពេលយប់ផងដែរ។ បើតាម IMD រលកកម្តៅនៅភាគពាយព្យ និងភាគកណ្តាលនៃប្រទេសឥណ្ឌា ទំនងជាថមថយបន្តិចម្តងៗ ចាប់ពីថ្ងៃព្រហស្បតិ៍។
កាលពីខែឧសភា ឆ្នាំ ២០២២ សីតុណ្ហភាពនៅផ្នែកខ្លះនៃទីក្រុងញូវដែលី បានឡើងដល់ ៤៩.២អង្សាសេ។ វាមិនមែនជារឿងចម្លែកទេចំពោះការកើនឡើងនូវកម្តៅក្នុងប្រទេសឥណ្ឌា ប៉ុន្តែការស្រាវជ្រាវវិទ្យាសាស្ត្រច្រើនឆ្នាំមកនេះ រកឃើញថា កត្តាប្រែប្រួលអាកាសធាតុបណ្តាលឱ្យរលកកម្តៅអូសបន្លាយពេល កើតឡើងញឹកញាប់ និងកាន់តែខ្លាំងក្លា៕ ដោយ៖ ធីរីណា