សារព័ត៌មាន នគរវត្ត តែងតែនាំមុខគេជានិច្ច
អ៊ុយក្រែនបានប្រកួតស្មើជាមួយម្ចាស់ផ្ទះ Euro 2024 អាល្លឺម៉ង់ ក្នុងលទ្ធផល ០-០ ក្នុងការប្រកួតមិត្តភាពក្នុងទីក្រុង Nuremberg កាលពីថ្ងៃចន្ទ ហើយខណៈដែលលោក Serhiy Rebrov គ្រូបង្វឹកបានរីករាយនឹងទម្រង់លេង ដោយលោកបាននិយាយថា ពួកគេនៅតែត្រូវពង្រឹងនៅខាងក្រោយមុនការប្រកួតជើងឯកអឺរ៉ុប។
អាឡឺម៉ង់ដែលមិនមានកីឡាករ Real Madrid និង Borussia Dortmund របស់ពួកគេបន្ទាប់ពីការប្រកួតវគ្គផ្តាច់ព្រ័ត្រ Champions League កាលពីថ្ងៃសៅរ៍នោះ បានគ្រប់គ្រងការប្រកួត ប៉ុន្តែមិនអាចធ្វើការវាយបកទល់ទម្លុះតំបន់ខ្សែការពារអ៊ុយក្រែនដ៏រឹងមាំដែលមានខ្សែការពារកណ្តាលបីនាក់នោះបានទេ។
លោក Rebrov បានប្រាប់អ្នកយកព័ត៌មានថា “ខ្ញុំពេញចិត្តនឹងលទ្ធផលនៃការប្រកួត ប៉ុន្តែយើងបានបង្កើតកំហុសជាច្រើនក្នុងការការពារ។ ដូច្នេះយើងត្រូវធ្វើការបន្ថែមទៀត។ យើងមិនទាន់បានត្រៀមខ្លួន១០០ភាគរយនៅឡើយទេ ហើយនៅក្នុងការប្រកួតជាមួយនឹងក្រុមដូចជាអាល្លឺម៉ង់ កីឡាករទាំងអស់គួរតែត្រៀមខ្លួន១០០ភាគរយ។ ទោះយ៉ាងណាក៏ដោយ វាជាការប្រកួតដ៏សំខាន់សម្រាប់ពួកយើង ដែលនឹងជួយយើងក្នុងការរៀបចំសម្រាប់ការប្រកួត Euro”។
ព្រឹត្តិការណ៍យូរ៉ូនឹងក្លាយជាការប្រកួតធំលើកដំបូងរបស់អ៊ុយក្រែនចាប់តាំងពីការឈ្លានពានរបស់រុស្ស៊ីមក ហើយលោក Rebrov ថា លោកមានការអរគុណដល់កីឡាកររបស់លោកដែលបានបង្ហាញការលេងដោយមិត្តភាពជាមួយនឹងអាល្លឺម៉ង់។
លោក Rebrov បន្ថែមថា “ខ្ញុំមិនទាន់សម្រេចចិត្តថាអ្នកណានឹងក្លាយជាអ្នកចាំទីដំបូងរបស់គាត់នៅ Euros នោះទេ។ វាមានសារៈសំខាន់ខ្លាំងណាស់ដែលជនជាតិអ៊ុយក្រែនបានឃើញពីរបៀបដែលយើងប្រយុទ្ធនៅលើទីលានបាល់ទាត់។ ខ្ញុំដឹងគុណចំពោះកីឡាករដែលពួកគេបានបង្ហាញពីស្មារតីជាតិរបស់យើង”។
ក្រុមជម្រើសជាតិអ៊ុយក្រែននឹងត្រូវប្រកួតមិត្តភាពជាមួយប៉ូឡូញនៅថ្ងៃសុក្រ និងម៉ុលដាវីនៅសប្តាហ៍ក្រោយ មុនពេលបើកយុទ្ធនាការ Euro 2024 របស់ពួកគេនៅថ្ងៃទី១៧ ខែមិថុនាទល់នឹងរូម៉ានី បន្ទាប់មកពួកគេក៏ត្រូវជួបស្លូវ៉ាគី និងបែលហ្ស៊ិកក្នុងពូល E ៕
(រូបភាព ៖ Reuters/CNA)
