ការវាយប្រហារលើនាវាផ្ទុកយន្ដហោះចម្បាំងអាមេរិក គឺជារឿងមិនពិត

ចែករំលែក៖

ក្រុមហ៊ូទី កាលពីថ្ងៃសៅរ៍ ទី២២ ខែមិថុនាបាននិយាយថា កងកម្លាំងរបស់ខ្លួនបានវាយប្រហារលើនាវាផ្ទុកយន្ដហោះចម្បាំងអាមេរិក Dwight D. Eisenhower នៅក្នុងតំបន់សមុទ្រក្រហម។ មន្ត្រីអាមេរិក ២នាក់បានប្រាប់ទីភ្នាក់ងារសារព័ត៌មាន Reuters ថា ការអះអាងគឺជារឿងមិនពិត។
នៅក្នុងលក្ខខណ្ឌមិនបញ្ចេញឈ្មោះ មន្ត្រីម្នាក់ក្នុងចំណោមមន្ត្រីអាមេរិកទាំង២នាក់ខាងលើ បានបញ្ជាក់ប្រាប់ Reuters យ៉ាងខ្លីដូច្នេះថា «វាគឺជារឿងមិនពិតនោះទេ»។ ក្រុមហ៊ូទី ដែលមានអ៉ីរ៉ង់ជាខ្នងបង្អែកបានបើកការវាយប្រហារលើកប៉ាល់ដឹកទំនិញ និងជួនកាលវាយប្រហារលើនាវាចម្បាំងអាមេរិកនៅក្នុងតំបន់សមុទ្រក្រហម តាំងតែពីខែវិច្ឆិកា ឆ្នាំ២០២៣ មកម្ល៉េះ ជាសកម្មភាពមួយដែលពួកគេអះអាងថាជាការបង្ហាញសាមគ្គីភាពជាមួយប្រជាជនប៉ាឡេស្ទីន ក្នុងតំបន់ហ្កាហ្សា ជាទីដែលអ៉ីស្រាអែលកំពុងធ្វើសង្រ្គាមប្រឆាំងនឹងក្រុមហាម៉ាស់។
នៅក្នុងការវាយប្រហារច្រើនជាង ៧០លើក ក្រុមហ៊ូទីបានបាញ់ពន្លិចកប៉ាល់ដឹកទំនិញ២គ្រឿង រឹបអូសកប៉ាល់មួយគ្រឿង ព្រមទាំងសម្លាប់បុគ្គលិកធ្វើការនៅលើកប៉ាល់ដឹកទំនិញ៣នាក់។ តែព្រមពេលជាមួយគ្នា នាវាចម្បាំងអាមេរិកក៏បានបាញ់កម្ទេចមីស៊ីលនិងដ្រូនមួយភាគធំរបស់ក្រុមហ៊ូទីដោយជោគជ័យផងដែរ និងដឹកនាំការវាយប្រហារតាមផ្លូវអាកាសម្ដងហើយម្ដងទៀត លើគោលដៅយោធារបស់ក្រុមហ៊ូទីក្នុងទឹកដីយេម៉ែន។
គួរបញ្ជាក់ថា នាវាផ្ទុកយន្ដហោះចម្បាំងអាមេរិក Eisenhower ដែលបានបិទបញ្ចប់បេសកកម្មដាក់ពង្រាយទៅកាន់តំបន់សមុទ្រក្រហមកាលពីថ្ងៃសៅរ៍ នឹងត្រូវបញ្ជូនឱ្យទៅឈរជើងរយៈពេលខ្លី ក្នុងតំបន់សមុទ្រមេឌីទែររ៉ាណេ៕ ដោយ៖ ធីរីណា