សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់មិនដឹងថាមានបញ្ហាអ្វីនោះទេ ក៏ស្រាប់តែមកទាត់ធាក់និងយកដុំថ្មគប់ទៅលេីរបងខុនដូមួយកន្លែង ត្រូវបានសន្តិសុខចាប់ឃាត់ខ្លួនប្រគល់ឱ្យសមត្ថកិច្ចយកទៅសួរនាំ ។
ហេតុការណ៍នេះបានកេីតឡើងនៅវេលាម៉ោង១១យប់ថ្ងៃទី៥ ខែកញ្ញា ឆ្នាំ២០២៤ ត្រង់ចំណុចខុនដូយីហោJJKK ដែលស្ថិតនៅតាមបណ្ដោយផ្លូវ៣៦០ កែងផ្លូវព្រះមុនីវង្ស សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ ។
តាមប្រភពពីសន្តិសុខដែលយាមនៅកន្លែងកេីតហេតុបានឱ្យដឹងថា មុនពេលកេីតហេតុ ពួកគាត់មិនដឹងថាជនជាតិចិនរូបនោះមានបញ្ហាអ្វីមកពីទីណានោះទេ ដោយបានដេីរមកឈរនៅមុខរបងខុនដូហេីយក៏ស្រែក រួចធាក់របងខុនដូនិងបានយកដុំថ្មគប់ចូលទៅក្នុងបរិវេណខុនដូបណ្តាលឱ្យខូចខាតរបស់របរតិចតួចផងដែរ ។
ប្រភពដដែលបានបន្តទៀតថា បន្ទាប់ពីឃើញសកម្មភាពបែបនេះហេីយ ពួកគាត់សន្តិសុខបាននាំគ្នាចាប់បុរសរូបនោះចងស្លាបសេក ព្រោះខ្លាចបុរសរូបនោះបង្កជាបញ្ហាអ្វីផ្សេងទៀត ហើយបានរាយការណ៍ជូនកម្លាំងសមត្ថកិច្ចមូលដ្ឋានចុះទៅជួយអន្តរាគមន៍បន្ត។
ក្រោយពេលកេីតហេតុ សមត្ថកិច្ចមូលដ្ឋានបានចុះទៅដល់កន្លែងកេីតហេតុ និងបាននាំខ្លួនជនជាតិចិនរូបនោះយកទៅប៉ុស្តិ៍នគរបាលរដ្ឋបាលបឹងកេងកងទី៣ ដេីម្បីសួរនាំនិងចាត់ការតាមនីតិវិធី៕
ដោយ៖សុខាសែនជ័យ
