សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ អ្នកនាំពាក្យសាលាដំបូងខេត្តកំពង់ចាម នៅព្រឹកថ្ងៃចន្ទទី០៩ ខែកញ្ញា ឆ្នាំ២០២៤នេះ មានកិត្តិយសសូមជម្រាបជូនសាធារណជនមេត្តាជ្រាបថា៖ កម្លាំងសមត្ថកិច្ចនៃការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពង់ចាម កាលពីថ្ងៃទី១ ខែកញ្ញា ឆ្នាំ២០២៤ បានបង្ក្រាបករណីគ្រឿងញៀនចំនួន ៤គោលដៅជាបន្តបន្ទាប់ ។ ដោយក្នុងប្រតិបត្តិការនោះគោលដៅទី១ នៅថ្ងៃទី១ ខែកញ្ញា ឆ្នាំ២០២៤ វេលាម៉ោង ១២ និង ៣០ នាទី នៅចំណុចភូមិសំបូរ ឃុំសំបូរ ស្រុកបាធាយ ខេត្តកំពង់ចាម ។ គោលដៅទី២ នៅថ្ងៃទី២ ខែកញ្ញា ឆ្នាំ២០២៤ វេលាម៉ោង ៩ និង ០០នាទី នៅចំណុចតាមផ្លូវជាតិលេខ៤ ស្ថិតនៅក្នុងភូមិព្រៃព្រីងជើង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ គោលដៅទី៣ នៅថ្ងៃទី២ ខែកញ្ញា ឆ្នាំ២០២៤ វេលាម៉ោង ២០ និង ០០ នាទី នៅតាមផ្លូវម្តុំសាលាកូរ៉េ ស្ថិតនៅក្នុងភូមិស្រែរាចាស់ សង្កាត់សំរោង ខណ្ឌពោធិ៍សែនជ័យ រាជធានីភ្នំពេញ ។ និងគោលដៅទី៤ នៅថ្ងៃទី២ ខែកញ្ញា ឆ្នាំ២០២៤ វេលាម៉ោង ២១ និង០០ នាទីនៅតាមផ្លូវស្ថិតនៅក្នុងភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។
ពេលប្រតិបត្តការបង្ក្រាបបទល្មើសសមត្ថកិច្ចបានឃាត់ខ្លួនជនសង្ស័យបានចំនួន ៤នាក់ រួមមាន ១.ឈ្មោះ កុំ សុផល ភេទប្រុស អាយុ ៤៤ឆ្នាំ ,២.ឈ្មោះ ម៉ឹង ប៊ុនកក្កដា ភេទប្រុស អាយុ ៤២ឆ្នាំ ,៣.ឈ្មោះ ហាត ហ៊ល ហៅ ធី ម៉ៅ ភេទប្រុស អាយុ ៣៥ឆ្នាំ ,និង ៤.ឈ្មោះ ផាន ស៊ាងហេង ភេទប្រុស អាយុ ៤៦ឆ្នាំ ចំណែកឯបក្ខពួកជន សង្ស័យ ៣នាក់ទៀត បានរត់គេចខ្លួនបាត់ ដោយដកហូតវត្ថុតាង ជាសារធាតុញៀន បានសរុប ទម្ងន់ ២.៣៥២,២៤ ក្រាម ជញ្ជីងអេឡិចត្រូនិចសម្រាប់ថ្លឹងថ្នាំញៀន សម្ភារៈសម្រាប់វេចខ្ចប់ថ្នាំញៀន ព្រមទាំងភស្តុតាង មួយចំនួន ដែលសង្ស័យជាប់ពាក់ព័ន្ធ នឹងករណីគ្រឿងញៀនខាងលើ ។
ក្រោយពីបានទទួល និងពិនិត្យសំណុំរឿងនេះ តំណាងអយ្យការបានសម្រេច ចោទប្រកាន់ លើជនសង្ស័យ ទាំង ៤នាក់ខាងលើ និងបក្ខពួក ពីបទ “ជួញដូរ និងរក្សាទុកដោយខុសច្បាប់នូវសារធាតុញៀន” ប្រព្រឹត្តនៅចំណុច ស្រុកបាធាយ ខេត្តកំពង់ចាម និងរាជធានីភ្នំពេញ កាលពីថ្ងៃទី១ និងថ្ងៃទី ២ ខែកញ្ញា ឆ្នាំ២០២៤ តាមបញ្ញត្តិ មាត្រា ៤០ នៃច្បាប់ស្តីពីការត្រួតពិនិត្យគ្រឿងញៀននិងបានស្នើសុំឲ្យចៅក្រមស៊ើបសួរសម្រេចឃុំខ្លួនជនសង្ស័យ ខាងលើជាបណ្តោះអាសន្ន ។
បន្ទាប់ពីទទួលបានសំណុំរឿង បានស្តាប់ចម្លើយជនត្រូវចោទ និងពិនិត្យឯកសារភស្តុតាងនានា ចៅក្រមស៊ើបសួរ បានចេញដីកាសម្រេចឃុំខ្លួនបណ្តោះអាសន្នលេខ ១៥៨៩ ព.១/២៤ ចុះថ្ងៃទី០៧ ខែកញ្ញា ឆ្នាំ២០២៤ លើជនត្រូវ ចោទឈ្មោះ អ៊ុំ សុផល ភេទប្រុស អាយុ ៤៤ឆ្នាំ, ដីកាសម្រេចឃុំខ្លួនបណ្តោះអាសន្នលេខ ១៥៩១ព្រ.១/២៤ ចុះថ្ងៃទី០៧ ខែកញ្ញា ឆ្នាំ២០២៤ លើជនត្រូវចោទឈ្មោះ ម៉ឹង ប៊ុនកក្កដា ភេទប្រុស អាយុ ៤២ឆ្នាំ, ដីកាសម្រេចឃុំខ្លួន បណ្តោះអាសន្នលេខ ១៥៩៣ ព្រ.១/២៤ ចុះថ្ងៃទី០៧ ខែកញ្ញា ឆ្នាំ២០២៤ លើជនត្រូវចោទឈ្មោះ ហាត ហិល ហៅ ធី ម៉ៅ ភេទប្រុស អាយុ ៣៥ឆ្នាំ និងដីកាសម្រេចឃុំខ្លួនបណ្តោះអាសន្នលេខ ១៥៩៥ ព្រ.១/២៤ ចុះថ្ងៃទី០៧ ខែកញ្ញា ឆ្នាំ២០២៤ លើជនត្រូវចោទឈ្មោះ ផាន ស៊ាងហេង ភេទប្រុស អាយុ ៤៦ឆ្នាំ ដើម្បីបន្តការស៊ើបសួរតាមនីតិវិធីច្បាប់ ។
អ្នកនាំពាក្យសាលាដំបូងខេត្តកំពង់ចាម សូមបញ្ជាក់បន្ថែមថា សាលាដំបូង និងអយ្យការអមសាលាដំបូងខេត្តកំពង់ចាម នឹងមានវិធានការយ៉ាងតឹងរឹងស្របតាមច្បាប់ ចំពោះជនត្រូវចោទខាងលើ៕ដោយ៖តារា
