សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍គ្រោះថ្នាក់ចរា ចរណ៍មួយបង្កឡើងដោយបុរសម្នាក់សង្ស័យស្រវឹងស្រាបើករថយន្តក្នុងល្បឿនលឿនរួចបានជ្រុលចង្កូតធ្លាក់ប្រឡាយទឹកស្អុយទាំង កណ្តាលអធ្រាត្រ។
ហេតុការណ៍នេះបានកើតឡើងកាលពីវេលាម៉ោង២និង៤០នាទីយប់ ថ្ងៃទី១១ ខែសីហា ឆ្នាំ២០១៦ ស្ថិតនៅតាមបណ្ដោយផ្លូវជាតិលេខ៤នៅមុខហាងAA2888 ណេត ២៤ម៉ោង ភូមិព្រៃព្រីងខាងជើង សង្កាត់ ចោមចៅ ខណ្ឌពោធិ៍សែនជ័យ។
តាមប្រភពព័ត៌មានពីអ្នកលក់បាយឆា ដែលនៅជិតកន្លែងកើតហេតុបាននិយាយ ថា មុនពេលកើតហេតុគាត់ឃើញបុរសខាងលើបើករថយន្តម៉ាកCRVពណ៌ខ្មៅ ពាក់ ស្លាកភ្នំពេញ2D-9206 ធ្វើដំណើរតាម បណ្តោយផ្លូវជាតិលេខ៤ ក្នុងទិសដៅពីលិចទៅកើតក្នុងល្បឿនលឿន។ លុះមកដល់ ចំណុចកើតហេតុក៏បានរេចង្កូតទៅផ្នែកខាងឆ្វេងបណ្តាលឲ្យជ្រុលធ្លាក់ប្រឡាយទឹក ស្អុយតែម្តងហើយសំណាងល្អមិនបង្កឲ្យ មានមនុស្សរងរបួសនោះទេ។
ក្រោយពេលកើតហេតុសមត្ថកិច្ចបានចុះទៅដល់ចំណុចកើតហេតុពិនិត្យជាក់ ស្តែងហើយដោយសារតែមិនឃើញបង្កគ្រោះថ្នាក់ដល់អ្នកដទៃទើបប្រគល់រថយន្ត ទៅឲ្យម្ចាស់ហៅរថយន្តមកស្ទូចយកទៅ ជួសជុលខ្លួនឯង៕ សុខាសែនជ័យ
