សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ម៉ូតូហុងដាឌ្រីមមួយគ្រឿងជិះឆ្លងផ្លូវត្រូវម៉ូតូ ADV បុកបណ្ដាលឱ្យរងរបួសធ្ងន់ស្រាលចំនួន៣នាក់ត្រូវបានបញ្ជូនទៅសង្គ្រោះនៅមន្ទីរពេទ្យកាលពីវេលាម៉ោង៩និង២០នាទីយប់ ថ្ងៃទី១៣ ខែកញ្ញា ឆ្នាំ២០២៤ នៅទល់មុខក្រសួងកសិកម្ម រក្ខាប្រមាញ់និងនេសាទ តាមបណ្តោយផ្លូវព្រះនរោត្ដម សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកេីតហេតុគេបានឃើញបុរស២នាក់ឪពុកកូនបានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FT-8478 ធ្វើដំណើរតាមបណ្ដោយផ្លូវព្រះនរោត្ដមក្នុងទិសដៅពី ជើងទៅត្បូង ពេលមកដល់ចំណុចកេីតហេតុក៏បានបត់ឆ្វេងឆ្លងផ្លូវបញ្ឆិតក្នុងគោលបំណងចូលទៅច្រកចូលក្នុងផ្ទះ តែគាប់ជួនពេលនោះក៏មានបុរសម្នាក់ទៀតបានជិះម៉ូតូម៉ាកហុងដាADV ពណ៌ខ្មៅ ពាក់ស្លាកលេខ ភ្នំពេញ 1KU-2771 បានជិះបោះពួយតាមបណ្ដោយផ្លូវព្រះនរោត្ដមក្នុងទិសដៅបញ្ច្រាសគ្នាពីត្បូងទៅជេីង ក៏ជ្រុលទៅបុកម៉ូតូហុងដាឌ្រីមដែលកំពុងឆ្លងផ្លូវយ៉ាងពេញទំហឹង បណ្ដាលឱ្យម៉ូតូទាំង២គ្រឿងរងការខូចខាតខ្ទេចផ្នែកខាងមុខយ៉ាងដំណំ ព្រមទាំងធ្វើឲ្យបុរសជាអ្នកជិះម៉ូតូ ADV រងរបួសបែកក្បាលហូរឈាមសន្លប់ស្តូកស្តឹង។ ចំណកខាងម៉ូតូហុងដាឌ្រីមវិញ កូនជាអ្នកឌុបរងរបួសបែកក្បាលនិងបាក់ប្រអប់ជើងខាងស្ដាំ ដោយបុរសជាឪពុករបួសបែកមុខក្បាលហូរឈាម អ្នកទាំងបីត្រូវបានបញ្ជូនតាមរថយន្តសាមុយយកទៅសង្គ្រោះនៅមន្ទីរពេទ្យរុស្ស៊ី។
ក្រោយពេលកេីតហេតុ ដោយសារតែមិនមានដំណោះស្រាយម៉ូតូទាំង២គ្រឿងត្រូវសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនរង់ចាំដំណោះស្រាយនៅពេលក្រោយជាបន្ត ៕
ដោយ៖ សុខា សែនជ័យ
