សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនជាតិចិនចំនួន៣នាក់ត្រូវបានកម្លាំងនគរបាលខណ្ឌសែនសុខសហការជាមួយនគរបាលប៉ុស្តិ៍អូរបែកក្អមឃាត់ខ្លួនពាក់ព័ន្ធនឹងការកាន់កាប់អាវុធដោយខុសច្បាប់(ទុកកាំភ្លើងខ្លី០១ដើម) និងអំពើជួញដូរដោយខុសច្បាប់នូវសារធាតុញៀន។
ប្រតិបត្តិការនេះធ្វើឡើងកាលពីរសៀលថ្ងៃទី១៦ ខែកញ្ញា ឆ្នាំ២០២៤ នៅចំណុចខុនដូស្តារស៊ីធី បន្ទប់លេខ១១២៥ ជាន់ទី១១ អគារទី៧ តាមមហាវិថីសហព័ន្ធរុស្សី ក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ បន្ទាប់ពីជនសង្ស័យប្រើប្រាស់អាវុធខ្លីគំរាមជនជាតិចិនដូចគ្នា។
ជនសង្ស័យដែលត្រូវឃាត់ខ្លួន១-ឈ្មោះ ស៊ី មីងយ៉ុង (SHI MING YUNG) ភេទប្រុស អាយុ៣៣ឆ្នាំ ជនជាតិចិន មុខរបរអនឡាញ (ឃាត់ខ្លួន មានសារធាតុញៀន) , ២-ឈ្មោះ វ៉ាង ជុន (WANG JUN) ភេទប្រុស អាយុ៣៣ឆ្នាំ ជនជាតិចិន មុខរបរអនឡាញ (ឃាត់ខ្លួន មានសារធាតុញៀន) , ៣-ឈ្មោះ វ័ន ជឺឡែង (WAN CHI LIANG) ភេទប្រុស អាយុ២៥ឆ្នាំ ជនជាតិចិន មុខរបរអន ឡាញ ។ អ្នកទាំង៣នាក់ស្នាក់នៅបន្ទប់លេខ១១២៥ ជាន់ទី១១ អគារទី៧ ក្នុងខុនដូស្តារស៊ីធី ផ្លូវសហព័ន្ធរុស្សី ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
តាមនគរបាលខណ្ឌសែនសុខបានអោយដឹងថា នៅថ្ងៃទី១៦ ខែកញ្ញា ឆ្នាំ២០២៤ វេលាម៉ោងប្រហែល ១៥និង០០នាទី សមត្ថកិច្ចប៉ុស្តិ៍នគរបាលរដ្ឋបាលអូរបែកក្អមបានទទួលព័ត៌មានពីខាងខុនដូស្តារស៊ីធី ថា មានជនសង្ស័យ០១នាក់ជាជនជាតិចិន ស្នាក់នៅបន្ទប់លេខ១១២៥ ជាន់ទី១១ បានធ្វើសកម្មភាពប្រើកាំភ្លើងខ្លីគំរាមជនជាតិចិនដូចគ្នា នៅក្នុងផ្សារម៉ាត ជាន់ផ្ទាល់ដី បរិវេណខុនដូស្តារស៊ីធី។ បន្ទាប់មក សមត្ថកិច្ចប៉ុស្តិ៍អូរបែកក្អម សហការជាមួយផ្នែកជំនាញនៃអធិការដ្ឋាននគរបាលខណ្ឌសែនសុខចុះទៅសហការជាមួយខាងខុនដូស្តារស៊ីធី ធ្វើការត្រួតពិនិត្យឆែកឆេរនៅក្នុងបន្ទប់លេខ១១២៥ រកឃើញអាវុធខ្លី០១ដើម ម៉ាកឡុក បង់ចំនួន ០១ គ្រាប់ចំនួន ០៤គ្រាប់, ក្រាមពណ៌សថ្លា(សង្ស័យជាគ្រឿងញៀន) ចំនួន០១ថង់ធំល្មម , ជញ្ជីងថ្លឹងថ្នាំញៀនចំនួន០១ ,លិខិតឆ្លងដែនចំនួន០១ក្បាល ,កាតចំនួន ០៥សន្លឹក(របស់ជនសង្ស័យ) និងធ្វើការឃាត់ខ្លួនជនសង្ស័យដែលជាជនជាតិចិនខាងលើចំនួន៣នាក់។
តាមជនសង្ស័យឈ្មោះ វ័ន ជឺឡែង (WAN CHI LIANG) បានសារភាពថា នៅក្នុងខែកក្កដា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានទិញអាវុធខ្លីម៉ាកឡុក(ខាងលើ) ពីជនសង្ស័យឈ្មោះ ហៅ ប៉ាជេ ភេទប្រុស អាយុប្រហែល២៨ឆ្នាំ ជនជាតិខ្មែរ ក្នុងតម្លៃ១៦០០ដុល្លារអាមេរិក នៅក្នុងក្រុងកំពង់សោម យកមកទុកប្រើប្រាស់ការពារខ្លួន។ បន្ទាប់មកនៅខែសីហា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានទៅយកថ្នាំញៀនមួយកញ្ចប់ធំល្មម និងជញ្ជីងថ្លឹងថ្នាំញៀន ចំនួន០១គ្រឿង ពីជនសង្ស័យឈ្មោះហៅ ស៊ែវ័លី ភេទប្រុស អាយុប្រហែល៣០ឆ្នាំ ជនជាតិចិន(ដែលជំពាក់ប្រាក់របស់ជនសង្ស័យឈ្មោះ ស៊ី មីងយ៉ុង ចំនួន ៧០០ដុល្លារ) នៅក្នុងបុរីមួយកន្លែងក្បែរខុនដូស្តារស៊ីធី យកមកទុកប្រើប្រាស់នៅក្នុងបន្ទប់ខុនដូស្នាក់នៅ ។ ក្រោយមកទៀត នៅរសៀលថ្ងៃទី១៦ ខែកញ្ញា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានចេញពីបន្ទប់ចុះមកទិញថ្នាំដុសធ្មេញនៅម៉ាតក្នុងបរិវេណខុនដូស្តារស៊ីធី ជាន់ផ្ទាល់ដី។ ពេលចូលដល់ក្នុងម៉ាត ក៏មានមនុស្សប្រុស០៣នាក់ជាជនជាតិចិនបានមើលមុខឌឺដងជនសង្ស័យឈ្មោះ ស៊ី មីងយ៉ុង មានចិត្តខឹងក៏ឡើងទៅបន្ទប់ខុនដូយកអាវុធខ្លីម៉ាកឡុកចេញពីថតតុ មកសៀតនៅចង្កេះខោខាងស្តាំ ចុះមកសួរនាំជនជាតិចិនទាំង៣នាក់នោះនិងដកកាំភ្លើងដាក់លើភ្លៅគំរាម រួចក៍សៀតអាវុធខ្លីនៅចង្កេះ ឡើងទៅបន្ទប់ខុនដូវិញ ។ក្រោយមកត្រូវបានកម្លាំងសមត្ថកិច្ចចុះទៅឡោមព័ទ្ធឆែកឆេររកឃើញកាំភ្លើងខ្លីក៏ឃាត់ខ្លួនតែម្តង។ ជនសង្ស័យត្រូវបានឃាត់ខ្លួននៅអធិការដ្ឋានដើម្បីចាត់ការតាមច្បាប់៕
ដោយ៖ ចន្ទ លីហ្សា
