ឥណ្ឌូនេស៊ីនឹងបាញ់ពន្លិចកប៉ាល់នេសាទ៧១គ្រឿង

នៅថ្ងៃទី១៧ ខែសីហាខាងមុខ គឺជា ទិវាឯករាជ្យឥណ្ឌូនេស៊ី ហើយប្រទេសនេះនឹងបាញ់កម្ទេចកប៉ាល់នេសាទបរទេស៧១ គ្រឿងដែលចូលនេសាទនៅក្នុងប្រទេសនេះត្រូវកម្លាំងទាហានយាមល្បាតតាមដែន សមុទ្រចាប់បាននាពេលកន្លងមក។ សកម្ម ភាពខាងលើគឺជាការខិតខំរបស់រដ្ឋាភិបាល ទីក្រុងហ្សាការតាដើម្បីការពារធនធានធម្មជាតិរបស់ខ្លួន។

ចាប់តាំងពីឆ្នាំ២០១៤មកទល់ពេលនេះ ឥណ្ឌូនេស៊ីបានបំផ្លាញកប៉ាល់នេសាទ ១៧០គ្រឿងដែលចូលនេសាទខុសច្បាប់នៅដែនសមុទ្រប្រទេសនេះ។ ក្រៅពីនេះ ទីក្រុងហ្សាការតាចង់ផ្ញើសារទៅឲ្យប្រទេស ចិនដឹងថា តំបន់សមុទ្រជុំវិញកោះ Natuna ជាដែនសមុទ្ររបស់ឥណ្ឌូនេស៊ីមិនអាចឈ្លានពានបានឡើយ អ្នកដែលចូលមក មានវាសនាដូចជាកប៉ាល់នេសាទទាំង អស់នោះ។

កាលពីខែមិថុនាកន្លងមកប្រធានាធិបតី Joko Widodo បានកោះប្រជុំគណៈរដ្ឋមន្ត្រី នៅលើនាវា KRI Imam Bonjol ជានាវាយាមល្បាតនៅលើដែនសមុទ្រជាប្រចាំ។ កាលពីខែកក្កដាកន្លងមករដ្ឋមន្ត្រីទទួល បន្ទុកដែនសមុទ្រប្រកាសថា នឹងធ្វើពិធី បុណ្យឯករាជ្យនៅលើកោះ Natuna ដោយមានការបាញ់កម្ទេចកប៉ាល់នេសាទបរទេស ជាច្រើនគ្រឿង៕ ម៉ែវ សាធី