🔥អគ្គិភ័យឆាបឆេះរោងស្នាក់នៅរបស់កម្មករអស់១៣បន្ទប់នៅអូរបែកក្អម

ភ្នំពេញ៖ រោងស្នាក់នៅរបស់កម្មករសំណង់ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្តាលឱ្យបន្ទប់ចំនួន១៣ បន្ទប់បានរងការខូចខាត ខណៈពេលដែលកម្មករនាំគ្នាចាក់សោទុកចោលទៅធ្វើការ។ 

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ២ និង ៣០នាទីរសៀលថ្ងៃទី១៨ ខែតុលាឆ្នាំ ២០២៤នៅចំណុចភូមិទ្រុងមាន់ សង្កាត់អូរបែកក្អម ខណ្ឌសែនសុខ  រាជធានីភ្នំពេញ។ 

តាមសាក្សីបានឱ្យដឹងថា នៅមុនពេលកើតហេតុគេឃើញភ្លើងបានឆាបឆេះខ្សែអុីនធឺណេតដែលទុកចោលនៅក្បែររោងស្នាក់នៅរបស់កម្មករហើយឆេះរាលដាលទៅបន្ទប់ស្នាក់នៅរបស់កម្មករយ៉ាងសន្ធោសន្ធៅបង្កឱ្យភ្ញាក់ផ្អើលយ៉ាងខ្លាំង។ភ្លាមៗអាជ្ញាធរនិងសមត្ថកិច្ចបានចុះទៅដល់កន្លែងកើតហេតុហើយទាក់ទងរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍បាញ់ទឹកពន្លត់។ 

តាមនគរបាលការិយាល័យបង្ការ ពន្លត់អគ្គិភ័យនិងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថានៅក្នុងហេតុការណ៍នោះរថយន្តពន្លត់អគ្គិភ័យចំនួន ៥ គ្រឿងបានទៅអន្តរាគមន៍បាញ់ពន្លត់ហើយភ្លើងបានរលត់ទៅវិញ។ 

រោងស្នាក់នៅរបស់កម្មករចំនួន ១៣ បន្ទប់ត្រូវបានភ្លើងឆេះរងការខូចខាត។ទាក់ទិននឹងការកើតមានអគ្គិភ័យនេះសមត្ថកិច្ចកំពុងតែធ្វើការស្រាវជ្រាវ។ 

តាមព័ត៌មានឲ្យដឹងថា នៅមុនពេលកើតហេតុនោះកម្មករបានចាក់សោបន្ទប់ទៅធ្វើការនៅការដ្ឋានស្រាប់តែភ្លើងបានឆាបឆេះយ៉ាងសន្ធោសន្ធៅបណ្ដាលឱ្យសម្ភារៈរបស់កម្មករត្រូវភ្លើងឆេះរងការខូចខាតទាំងស្រុង៕

ដោយ ៖ រ៉ារ៉ា