សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ ក្នុងចំណោមបក្ខពួក០២នាក់ ត្រូវប្រជាពលរដ្ឋឃាត់ខ្លួនបាន និងវាយម្នាក់មួយដៃមួយជេីងទេីបប្រគល់ឲ្យសមត្ថកិច្ច បន្ទាប់ពីពួកគេធ្វើសកម្មភាពឆក់ខ្សែក១តម្លឹងពីបុរសម្នាក់បានសម្រច កាលពីវេលាម៉ោង១២ ថ្ងៃត្រង់ ថ្ងៃទី២២ ខែតុលា ឆ្នាំ២០២៤ ត្រង់ចំណុចមុខមន្ទីរពេទ្យជប៉ុន ក្បែរនិងរង្វង់មូលកួចកាណុង តាមបណ្ដោយផ្លូវព្រះមុនីវង្ស ក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បានដើរនៅមុខមន្ទីរពេទ្យជប៉ុន ខណៈពេលនោះក៏មានជនសង្ស័យ២នាក់ជិះម៉ូតូ២គ្រឿងបានធ្វើដំណើរតាមបណ្ដោយផ្លូវព្រះមុនីវង្ស ក៏បានធ្វើសកម្មភាពឆក់ខ្សែក ពីបុរសខាងលើបានសម្រេច ទេីបបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចប៉ុស្ដិ៍ស្រះចកធ្វើការប្រដេញចាប់ជនសង្ស័យបានម្នាក់ រួមទាំងម៉ូតូហុងដាឌ្រីមស៊េរី២០២២ ពណ៌ខ្មៅពាក់ផ្លាកលេខភ្នំពេញ1JK. 3342 មួយគ្រឿងផងដែរ ខណៈពេលដែលជនសង្ស័យជិះម៉ូតូបុកសន្ដិសុខដែលធ្វើចរាចរណ៍រងរបួសធ្ងន់ ត្រង់ចំណុចផ្លូវ១០២ កែងនិងផ្លូវព្រះនរោត្តម បង្កការភ្ញាក់ផ្អើលដល់ប្រជាពលរដ្ឋស្វាគមន៍ម្នាក់មួយដៃមួយជើងបណ្ដាលឲ្យរបួស រួចក៏ប្រគល់ជូនសមត្ថកិច្ច ។ ដោយឡែកជនសង្ស័យម្នាក់ទៀតបានជិះម៉ូតូរត់គេចបាត់ស្រមោលរួមទាំងខ្សែក១តម្លឹងទៅជាមួយ ។
ក្រោយកើតហេតុ ជនរងគ្រោះបានទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលស្រះចក ដេីម្បីឲ្យសមត្ថកិច្ចចាត់ការតាមច្បាប់ ។ ចំណែកជនសង្ស័យខាងលើ សមត្ថកិច្ចជំនាញក៏បានធ្វើការសាកសួរនិងកសាងសំណុំរឿងបញ្ជូនទៅតុលាការចាត់ការតាមនីតិវិធី ៕
ដោយ ៖ ភារ៉ា ដង្កោ
